Kohima nung “Energy Efficient Nagaland” scheme tenzük

Dimapur, October 21 (TYO) : Hokolbarnü Kohima DC indang Conference Hall nung Forest, Environment & Climate Change Minister, Dr. Neikiesalie Nicky Kire-i “Energy Efficient Nagaland” scheme sayatsüogo.
Ministry of Power, Government of India kübok Energy Efficient Service Limited (EESL) ajanga Unnat Jyoti mapa inyaker aser parnoki Affordable LEDs for All (UJALA) scheme, energy efficient fans aser tube lights programmes mapatem inyaker. Nagaland nung EESL-i nübortem nem 25 lakh LED bulbs, 1.5 lakh energy efficient fans aser 2.5 lakh tube lights alemtsü sentong lir.
Tanü sentong nung tongti tesemdanger Dr. Nicky-i Kohima Deputy Commissioner indang Conference Hall nung LED bulbs aser fans tsükloktsü aser pai ashiba agi, LED bulb aser fan amshiba ajanga energy kümzüka ayutsü.
Paisa, district administration aser EESL Company nem tenüngsang agütsü aser district balala nung ketdangsertemi iba mapa takok ngua inyaktsü atema tayongzükba agütsü.
“Khristmas mongpu tonga arur aser December ita nungibo ki ajak nung petinutem sendaktsü aser ibaji ajanga load-shedding kanga bulutsü. Kilen shiai iba programme ya inyakra, petinu meyirjang aika sendak yonga energy kasa dang asütsü,” ta Dr. Nicky-isa ashi.
“Asenoki Power department dak tai tongloktsür. Ajisüaka, tang aliba transformer tem kanga tejen kümer aser transformer tem tuluba nüngdaker. Power department dang masü saka department shia nem nüngdakbatem agütsüra, kanga renloktsü” ta paisa shisem.
Sentong nung Kohima Deputy Commissioner, Rovilatuo Mor, IAS-i okila jembidang, District Administration-i power peria manguba indang khuret atema mapa inyaker, ta ashi.
Sentong nungsa Assistant Commissioner, Rent Wilfred, IAS (P)-i “Energy Efficient Kohima” indang osang tatsüka metetdaktsü aser SDO (C) Sadar Kohima, Kethosituo Sekhose-i anküp tepela o jembi.
Sentong nung mendenji ADC Kohima, Lithrongla Tongpi liasü aser Chief Engineer Power, SP Kohima, sorkar ketdangsertem,  DPDB members, KVC, Wards, Colonies aser LED applicants tem aden.
Kohima district kübok ward, colony aser yimtsüngtem aser anameta aliba yimtsüngtem nem 50,000 LED Bulbs lema agütsü.