MDPA tenteter küm tenem jungogo

Mokokchung, Town Hall, nung Mokokchung District Pensioners’ Association, Golden Jubilee mung amongba mapang DC Mokokchung, Sushil Kumar Patel IAS aser T. Senka Ao nati o jembiba noksa nung angur. (Mokokchung on Oct. 21, 2016)

Mokokchung, Oct 21 (TYO): Mokokchung District Pensioners’ Association (MDPA) tenzüker küm tenem  ajungba hon jubilee mung sentong ka yangi Mokokchung Town Hall nung meraketa agiogo. Iba tepela benjong nung temenungratsü Mokokchung alirtem den ano Nagaland Pensioners’ Association aser kidanger district-tem nungia pensioner-tem desema kanga longsotepa mungogo.
Tanü iba sentong nung Mokokchung Deputy Commissioner, Wb. Sushil Kumar Patel IAS-i tajungshi o jembidang, sorkar mapa nung küm 35 tashi inyaker aser küm 60 junger pensioners ka akümbaji atamata temoatsüka masü, ta ashi.
“Pensioners-temji temetetba agi sünga lir, nenok dak tajangshiba aika lir, anungji, khuret abenba senso kaka asütsü merangtsüla”, ta paisa tayongzükba ka agütsü.
“Sorkar mapa nungi sodi ngur külen takümji balaka akümtsüa akok, joko tain kümerji kecha meinyaktettsü ta temulung majemtsüla saka tepela angutsü atema mapa inyaktsü jangratsüla”, ta paisa inyakdaktsünüba olen ka ashi.
Paisa Mokokchung District Pensioners’ Association aser Nagaland Pensioners’ Association-i maparen balala nung sorkar khuret tongzüka shilem tajung agiba asoshi pelaba lemsatep. Mokokchung D.C-isa MDPA hon jubilee nüngtem adokba nüngo kaket ka sayatsü.
MDPA jubilee amungba nüngtem Imkongliba Memorial District Hospital (IMDH) Mokokchung nung teintet rogotem asoshi takdang (cabin) ana yanglutsütsü bangzünga yuogo.
Iba sentong nung tongti o jembir Wb. T. Senka Aoi pensioner-tem nem inyakdaktsünüba o aika bener arua ayongzük. Iba sentong nung Wb. R. Ayim Lkr menden liasü, MDPA tir Wb. I.B Mereni tarur ajak pela agizük. Nagaland Pensioners’ Association tir Wb. Rukhrielhulie-i jubilee salem o bener aru. Tejenpur rongnung Wb. L.T Aieri jembi. Jubilee planning committee mendenbuba Wb. Y.Lanu Imchen ajanga tepela o lemsatep.