IS-i Syria nung 230 shi tashiyim agi pur ao:SOHR

Beirut, August 06 (Agencies): Islamic State (IS) ta ajaba kiralongrar teloki Syria tiyongtsülen tentetba jila ka amakba sülen Christian-pur 60 shi densema nübur 230 shi tashiyim agi pua anir aoba osang ka nübur temeten asoshi nokdakba tongti telok kati tanü Hokolbar nü metetdaktsüogo.

IS teloki Al-Qaryatain jila tan Bodbar nü tashiyim agi agiba sülen tasüng, Brehostibar nü nüburtemji tashiyim agi pua anir ao ta Britain nung tentetba Syrian Observatory for Human Rights (SOHR) teloki tanü metetdaktsü.

“IS teloki Al-Qaryatain jila nungi ishiba agi nisung 230 shi tashiyim agi pua anir aoba osang tang tashi nung jangjaogo,” ta SOHR lenisang, Rami Abdel Rahman-i ashi.

IS teloki tan pua anir aoba Christian-purtem rong nung parnok timba ka Syria anüdoklentip tsütsü tentetba Aleppo province toktsür Al-Qaryatain nung jenoka alirtem aliba osang jangjaogo ta pai shisem.

“Syria sorkar pusema sorkar den yariteper ta shia aitsüba sülen IS teloki tan tai maketba nüburtemji tashiyim agi pua anir aoba osanga jangjaogo,” ta Rahman-i metetdaktsü.

Al-Qaryatain jila ya IS teloki tashiyim agi agia aliba Homs aser Qalamun tesem na tsüngda tentetba tongti jila ka lir.

“IS telok den tongpang raratsü tenzükba jakdangbo Al-Qaryatain jila nung Sunni Muslim nübur 18,000 aser Syriac Catholics & Orthodox Christian-tem 2,000 shi liasü saka IS teloki Al-Qaryatain jila aginü tashi nungbo jila nung Christian-pur 180 shi dang aliba osang bushitetogo,” ta Damascus yimti nung tentetba Syriac Orthodox Patriarchate nung secretary, Bishop Matta al-Khoury-ia metetdaktsü.