Pan masala ad. atema ni kanga aoksa aser mepelar:Pierce Brosnan

Los Angeles, October 21, 2016 : Hollywood actor Pierce Brosnan-i, India pan masala advertisement nung ni mesükba noksa yanglur amshiba atema mepelar, ta ashi.
Pai, ni mesüka yanglur advertise asüba pan masala nungji cancer adokdaktsüba chiyungtsü/oset densema alitsü akok ta angashia ni kanga aoksa aser jashir, ta ashiba People magazine ajanga metetdaktsü.
Brosnan-i, “Ni India aser yangji aliba nüburtem kangasa meimer. Ni küm jenti tetsür anema aliyim asoshi aser lipoküm kümzüka ayutsü atema inyaka aruba nisung ka lir anungji ni kodang Pan Bahar-i kü dang masüngdangi pan masala ajungketba mapa nung ni mesükba noksa amshiba angashi ni shisatsü nung animesüngzüktetti aküm,” ta ashi.
“Nisung temang nung timtem adoktsütsü keta aliba chiyungtsü ka ajungkettsütsü atema ni kodanga memulungla,” ta Brosnan-i sangdong ka nung ashi.
James Bond film tem nung tongti shilem agisang, arishi küm 63 tain, Brosnan-i, “Kü contract nung metsü den meyoktepdang metsü-a temerem mekümdaktsüba “breath freshener/tooth whitener” ka ajungkettsü indangang shia lir,” ta ashi.
Pai ashiba agi, ni oset ka ang ajungkettsütsü mulungtep aser iba oset nungji moko, supari mesüra temang nung timtem adokdaktsüba chiyungtsü densema mali ta kü dang ashi.
“Kü kinungtsü aser jala den ano tembar jenti cancer tashidak agi asüba ajangshia aruba sülen ni tetsür aser meimchir ajak temang anema aliyim kanga nungiter,” ta pai sangdong nungji shia lir.
Brosnan-i iba company dang parnok oset ajak nungi pa noksaji agientsü takhangba ka agütsüogo aser pai tangar dak timtem adokdaktsüba chiyungtsü ajungkettsür asü ta memeteti liasüba metetdaktsü.
“Ni iba tebilemtsü ya bentettsü. Anungji kar tanga iba advertisement ajanga yirudaktsür lira kü dang tai tokangma,” ta sangdong nungjisa shia lir.
Pan masala advertise sütsür ta angashia aikati aitsüogo aser Twitter nunga kanga aitsütepdar.