HIV & AIDS atema sensitization & training sentong agi

Dimapur, October 21 (TYO) : October 19, 2016 nü Directorate of Tourism, Kohima conference hall nung Tourism Department, Tour Operators aser Hotel Associations ketdangsertem nem HIV & AIDS atema sensitization & training sentong ka agütsü. Iba sentong ya Nagaland State AIDS Control Society (NSACS) aser Directorate of Tourism, Nagaland na lokteper ayonga liasü.
Sentong nung adener pela agizükba mapang Department of Tourism nung Addl. Director & HoD, K.T Thomas-i, tadenertem dang iba maongka agia training mapang takok tashi angazüktsü aser NSACS-i iba sabang ajanga HIV & AIDS tebilemtsü tali tajungba lemsateptsüla, ta ashi.
Training nung tang HIV koba tashi ka nung lir aser ibaji atema state nung teyari kong nungi angutsü, HIV & AIDS terasa, iba tashidak alirtem lokti nung magizükba, tourisim ketdangsertem dang nungi yimla aliba ozüngtem, Hotel Associations aser Tour operators tem dang HIV & AIDS nokdangtsü tesayuba aser lanurtem atema külemi lokteper HIV & AIDS atema inyaktsütem angatetdakja liasü.
Iba sentong nung shisalen tuyurtemji NSACS Deputy Director (M&E), Dr. Vezokholu Theyo, Dr. Mehokhu Zao, SMO, ART Plus Centre, NHAK, Metevinuo Sakhrie, Joint Director (IEC) NSACS aser Tarepnokcha Jamir, Deputy Director (MST) NSACS nunger liasü.
Iba sentong tatem küma anküp tepela o NSACS Asst. Director (MM), Chongkoi Khaming-i jembi. Directorate of Tourism, Nagaland Tourism Association aser Nagaland Hotels & Restaurant Association nungi ketdangsertem dena sentong nung shilem agir ajak agi nisung 51 liasü.