EU-i jembiba ama meinyaker: Freeland

Brussels, October 22 (Agencies): European Union (EU) tenteti jembiba ama mapa küma meinyakba olen ka Canada Trade Minister, Chrystia Freeland-i tanü, Honibar nü metetdaktsüogo.
Taoba küm 7 tashi kanga meranga inyaktepa aruba sülen EU aser Canada na tsüngda tongti shishilembatsü tezüngzüktep tatem küma agitsü renema liasü saka Belgium region-i tezüngzüktep magizüktsü renemba onük ka benokba sülen iba tezüngzüktepji bilemba ama takok ngua magitettsüsa tang tia ajurua lir.
“Sentong renemba ama, shishilembatsü tezüngzüktep takok ngua agitsüji joko EU khuret lir,” ta shia, European Parliament lenisang, Martin Schulz-i aniba teloki tezüngzüktep takok ngua agitsü atema nungdakba maparen inyaktsü nungloktsüba olen ka Freeland-i metetdaktsü.
“Tezüngzüktep takok ngua agitsü mesüra magitsü khuret Europe-i benokogo. Ni ozü Ato Kilonser, Justin Trudeau den aroki anogo ishika tsüngda nung Europe-i tanaben shilanga, renemba ama, shishilembatsü tezüngzüktepji tembanga agitsü imlar,” ta lai shisem.
Canada den agitsü renemba tezüngzüktep takok ngua agitsü nükjidong nung Schulz-ia Wallonia region’er socialist sorkar lenisang, Paul Magnette den ghonda 11 tashi agia senden amenba osang angazükogo.
“Ozü EU kibok tangatetba balala aliba ajanga tan tezüngzüktepji takok ngua magitettsüsa tia ajurua lir. Ajisüaka, tarutsü anogotem nung mangatettepbaren ajunga angatettepa, linük 28 züngsemba EU aser Canada nati shishilembatsü tenzüngzüktepji takok ngua agitsü imlar,” ta Schulz-i Magnette den senden amenba sülen metetdaktsü.
Canada aser EU na tsüngda Comprehensive Economic & Trade Agreement (CETA) tezüngzüktep takok ngua agiba ajanga nübur million 500 shi densemba EU aser alima ajunga nung rongsenren jenjang tulutiba rong nung 10 buba, Canada na tsüngda shishilembatsü tesendaktep tajung alitsü renema lir.
Iba tezüngzüktepji Trudeau aser Schulz na tsüngda EU tesepti, Brussels yimti nung taruba Brehostibar nü zülutepa agitsü renema liasü aser iba alizüngji asangsang nung ataloktsü ta temulung lema bilemba olen ka Schulz-i metetdaktsüogo.