US Defense Secretary, Carter-i Iraq semdangogo

Baghdad, October 22 (Agencies): US Defense Secretary, Ash Carter-i mapang jilia osang kecha memetetdaktsüi Iraq yimtiba, Baghdad tanü, Honibar nü semdangogo.
Carter-i tanü Baghdad nung Iraq Ato Kilonser, Haider al-Abadi aser par mitkar lenirtem den ajurutepa, US-i nungitba Iraq mitkartemi tenzüka aliba Islamic State (IS) ket nungi Mosul yimti tanaben agishitsü mitkar mapatong den sentakba osangtsüsang agia liasü.
Tan Hombar nü nungi tenzüka agiba mitkar mapatongji US-i aniba alima teloktep mitkartemi 2003 küm nungi tenzüka, Iraq nung telungpur aser kiralongrartem anema tongpang raratsü tenzükba sülen tan Iraq nung tongpang tesashitiba akümtsü lir.
US-i aniba alima teloktep mitkartemi par tayimtsü aser mitkar züngsemtem yoka nungitba Iraq mitkar aser par telok den yariteper, Kurdish Peshmerga sepaitemi tan Hombar nü nungi tenzüka tanü tashi nung Mosul yimti anülulentip, anüdoklen aser anüdoklentip tsütsülen tentetba yimtsüng 50 shi takok ngua agiba osang jangaogo.
IS teloki tashiyim agi agia aliba Mosul yimti nung nisung million 1.5 shi tanga timtem toushi jenti ajurua aliba osang bushiteta lir aser tan par yimti nung tongpang raraba ajanga alima ajunga nung meimchirtem nem teyari agütsütsü mapatong tulutiba inyaktsüsa akümba osang ka United Nations (UN)-ia metetdaktsüogo.
Alimai nungitba Iraq mitkartemi Mosul yimti IS ket nungi tanaben agishiba sülen Mosul yimti nung tensa azüoktsü aser par nüburtem taküm jenjang tajungba kümdaktsütsü den sentakba onük Carter-i tanü Iraq lenirtem den benoka jembiogo.
Ano külen, Mosul yimti tanaben agishitsü mapatong nung Turkey mitkartem nema tongti shilem agidaktsütsü atema Turkey sorkari benokba onük magizükba olen ka Abadi-ia tanü Carter den ajurutepa senden amenba sülen sangoktsü.
“Turkey sorkari par mitkartem yoka, Mosul yimti tanaben agishitsü mapatong nung tongti shilem aginüba osang metetdaktsü saka iba mapatongji ozü Iraq kijai takok ngua inyaktettsü ta telangzüba agütsüogo. Tarutsü mapang teyari nungdakra, Turkey aser kidangsüa aliba linüktem nungi teyari meshitsü tebilemba lir,” ta pai osang jangjashitsü.
Carter-i yashi, Hokolbar nü Turkey semdanga Turkey lenisang, Tayyip Erdogan den senden amendang Turkey sorkari Iraq’er taginüba agizüktsü ajungshiba osanga jangjaogo.