Punjab actor tejen Mehar Mittal süogo

New Delhi, October 22, 2016 : Punjab nunger actor tejen Mehar Mittal Honibarnü Mount Abu, Rajasthan nung aliba mozü ki ka nung asü. Pa asüba osang tejangja par kinungertemi osangbenertem dang metetdaktsü. Mittal ya Punjab nung ajaki jangja aliba nisung ka liasü kechiba süra pai küm aika film nung shilem agia liasü. Pai movie 100 dak tema nung shilem agia lir aser iba den külemi TV nunga shilem agi. Hopta ishika tejakdang pa süogo ta olulu kar adok aser indangji celebrity temi social media nung pa den asüku lemsatepa liasü.
Mittal ya Bathinda district kübok yim tila ka nung October 24, 1935 nü aso. Pa law züngtemer Chandigarh nung küm 8 tashi law practise süa liasü aser iba sülen film nung shilem agitsü tenzük. Pai mezüngsüa ‘Sacha Mera Roop Hai’ film nung 1974 küm shilem agi. Iba mapang nungi tenzüka pai film 300 dak tema aser TV soap opera tem nung shilem agia lir. Pai film nung shilem junga agitetba ajanga 136buba Dadasaheb Phalke Jayanti sentong Mumbai nung akadang Dadasaheb Phalke Academy sempet angu.
Mittal-i shilem agiba film rongnung Qahar (1998), Tum Karo Vaada (1993), Jorr Jatt Da (1991) aser Qurbani Jatt Di (1990) film tema densema lir.
Pa tain akümba sülen pai pa taküm tamang nung akanga alitsü tenzük.
“Ni sapurtemi kü dang tamang tsütsü kanga asüngdanger, ajisüaka tamang akanga alibaji kecha dena atishiteptsü makok aser iba yagi nisung ka taküm tobur kanga jungdakja ajak peria kümdaktsür. Ni jala pezü lir, saka ni panopk rongnung ana dang kanga pelar kechiba süra tena küm 20 shi iba telok nung dena arur aser nia tena ama tamang nung tashi ita kümdaktsü. Iba lenmang ajanga nisung tain taküm ka kanga süngjema kümdaktsür. Asenok dak aliba shisatsü aser sempet tem ajak Tsüngrem nungi lir ta asenoki mamadoktsüla,” ta pai akümlidang ashi.
Hindustan Times-i interview ka nung pa dang Punjab film industry nung nai ajangshiba rongnung mamatetba ka shiang ta asüngdangdang pai, “Shilem ajakji mamatetba tajangshiba kaka aser temulung nungi kodanga maoer, ajisüaka ni asaya menü shilem agibatem bilemteta khenkhenbo kanga menür. Asaya menüba shilem agiba ajanga kü taküm jangratemtsüka kümdaktsü aser alima nung mozü tajungtiba, menüba, ni kü sapurtem nem agütsütetba atema ni kanga nema tanga bilemer. Ajak liaka ni shilem agiba Do Madari, Valiati Babu, Jeeja Saali, Kunwara Mama aser Jatti film tem ni mamateter,” ta langzü.
Mittal ya Punjab actor temi ranglokba actor ka liasü. Pa küm pezü bendanga meditate asüba sülen Mount Abu-i anir ao.