Arogo lennirtemi ochimashi anema raratsü bangzünga renem

Dimapur, October 22 (TYO) : Dimapur Christian Fellowship (DCF) kübok Arogo balala nungi lennirtemi Naga loktiliba nung ochimashi indang khuret koktettsü atema tebilembatem lemsatepa teinyaktsü sentong ka atongogo.
Honibarnü Dimapur nung Arogo lennirtemi ‘Christian response to corruption in public life’ omen nung ajemdaker shisalemsatepba sentongji agi aser iba mapang Khristan lennirtem aser tamangertemi Arogo aser loktiliba nung ochimashia inyakyim menokdangtet ta agizük aser ochimashi anema raraba mapa nung tali teyakyakba shilem agitsü bangjemtep.
Sentong nung social activist, Niketu Iralu-i okila jembidang, Naga nunger ama tang renlokba loktiliba ka nung Arogoi ochimashi adokdaktsüba inyakyimtem metettsüla, ta ashi.
“Nagaland ama kinük nung aliba tesem ka nung aliba nisungtemi alima nung atalokbatem repranger aser ajizüktsü meranger aser idangji asenoki ‘kanga kara aiba loktiliba nunga mapa shitak meinyakteter nung, kechiba asenoki khuret abentsü’ ta tangatetba nung taküm alitsü meranger. Public lennirtemia ochimashi onük asoshi meinyaktet aser taoba India Prime Minister kati ochimashi ya ‘alima’ yimya’ ka dang ta ayongayonga jembiogo,” ta Iralu-isa shisem.
“Lennirtemi iba ama jembiba ajanga nübortem aser talisa lanurtem tekolok nung idaktsür aser parnokia ochimashi agizüka benshitsü yimya sübadaktsür,” ta paisa metetdaktsü.
“Arogoi-i tasüngdangba asem jangjajangja metettsü tim. Tasüngdangba asemji- Tsüngremer yimliji kechi? Tsüngremer yimli aser Tsüngrem kong lir? Tsüngremer yimliji kodang?” ta Iralu-isa ashi.
“Khristantem ama, Naga nungeri item tasüngdangbatem asoshi ratamata lira, ochimashi anema rara nung tamakok angutsü. Kodaser ni alima nung Tsüngremi sayuba ama alitsü ta tasüngdangba yur alitsü merangra, Nagaland nung temelenshi tulu arutsü” ta paisa ayongzük.
Sentong nung NBCC General secretary, Rev. Dr. Zelhou Keyho-i ‘Church’s response to corruption in public life’ onük jembidang, “Naga Arogoji ano lanu lir saka ochimashi ta ajaba khuret tulu den raratsüsa mapang tonga aruogo aser iba onük ya shisatokden sentong balala nung onük benoka jembiyonga aruru saka iba asoshi telatetba ka monguteti lir,” ta ashi.
Ochimashi anema raraji tanü nungi tenzüktsüla aser Arogoi Laishiba tesayuba nung iba anema inyaktsüla, ta paisa ashi.
“Tanü asen loktiliba nung ochimashiji cancer ama lir. Iba yagi asenok shirangdaktsüba dang masü saka asenok teinyaktsüa meinyaktet kümdaktsüogo. Ochimashi ajanga asenok dak tajung aliba ajak chimadaktsüogo. Ochimashi ajanga lanupututem indang teimla aser tejangrabatem ajak samatsüogo. Iba ya ajanga asen loktiliba nung nüngdak maliba telok aika adokdaktsüogo. Asenoki ochimashi atema meinyakra, ochimashi anema rara nung tamakok angutsü” ta Rev. Keyho-isa ashi.
Tanü panel discussion agiba sülen ‘action plan’ ka yanglu. Panel discussion nung onirji Dr. Hesheto Chishi liasü aser panel züngsemtemji- Rev. Dr. Wati Aier, Pastor Yanbemo Lotha, Rev. Dr. Shiwoto Sumi, Rev. Dr. Thungdemo Ngullie aser Rev. Dr. Solomon Vizo nunger liasü.
Telemtetbatem: Laishiba dangi meyipa, ketdangsübaren akangshitsü atema tesayuba agütsütsü.
Arogotem nung anti-corruption awareness tenzüktsü aser ibaji ajanga süpokrem aser ochimashi dang ‘ma’ ta shitettsü tangatetba agütsütsü.
Arogo ketdangsübaren nung teinyaktsütem latettsü aser mangatettep madoktsü atema inyakyimtem melenshitsü.
Süpokrem aser ochimashi anema raratsü atema civil society movement tsüngda NGO tem den külemi inyaktsü.
Inyakyim aser loktiliba nung rejutem nung ochishia inyaktsü atema arogotemji sabang ka ama inyaktsü aser iba dak sendakba nung Seminary, Bible school aser arogotem nung sentongtem ayongzüka agitsü.