UP, Punjab, Goa & Manipur kasa mapang nung election agitsü

New Delhi, October 23 (Agencies): Uttar Pradesh den Punjab, Goa, Uttarakhand aser Manipur state tem nung kasa mapang nung election agitsüa akok; sangküm February 1 nü Union Budget benokba sülen kobi melii item state tem nung February-March ita election agitsü akok, ta osang ka ajanga ashi.
Punjab, Goa, Uttarakhand aser Manipur state tem nung anogo ka nung dang election agitsü saka Uttar Pradesh nungbo shilem tenet lemsar agitsüa akok, ta Election Commission (EC) telung osang ka ajanga ashi.
Küm ana tejaklen Lok Sabha elections nung BJP-i takok tulu ngua liasü, iba mapang nung parnoki Uttar Pradesh nung menden 80 nungi 70 tashi nung takok angu, aser maneni parnoki state assembly election nunga SP party-i küm 15 yimsüsüa aruba atsüngdoktsü nükjidong yur inyakdar.
UP assembly election nung BSP-ia SP aser BJP den atongtepa tokteptsüa akok.
Punjab nung sorkar tashi nung aliba SAD-BJP teloktepi kümsük ana tashi takok nguogo aser tan election nungbo parnoki Congress aser AAP den atongtepa tokteptsü südi. Ano külen Uttarakhand nung sorkar tashi nung aliba Congress-i BJP den atongtepa tokteptsü.
Goa nung sorkar tashi nung aliba BJP-i maneni sorkar tashi angutsü nükjidong yur renemdar aser iba state nung parnoki Congress aser AAP den tokteptsü. Maneni Manipur nunga Congress-i sorkar tashi angutsü nükjidong yur inyakdar.
Sorkari February 1 nü Lok Sabha nung Union Budget benoktsü atema asüngdangogo, koba ajanga model code of conduct ozüng alema meinyaktettsü.
Mapang shitak nung state assembly tem tentettsü asoshi Commission-i March ita nungbosa election maparen tembangtsü tebilemba nung election atema sentong asameyangdar.
Tawa Chief Election Commissioner (CEC), Nasim Zaidi-i, “Onoki security sepaitem, tsüngsang mongpu aser tadidang mapangtem asadangdar- item ajungaji temelung nung yur inyakdar,” ta metetdakja liasü.
Uttar Pradesh assembly kümsük May 27, 2017 nü tembangtsü, Uttarakhand Assembly kümsük March 27, 2017 nü tembangtsü aser Goa, Manipur o Punjab assembly tem kümsük March 18, 2017 nü tembangtsü.