Christian Tekülem Kimong 1872

– Talitemjen Imchen.

“Naga Arogo Otsü Kimong Tejangja Nüngdaker” ta tenüngteter koba Tir Yimyim osang kaket nung Wb. Sünep Tzüdir-i 17th October 2016 nü adoktsüogo, onükji kanga tim ka lir ta nia bilemer. Iba onük ya lanu asensortemibo kanga ratatsüsabo mebilemer aser tawa tanü tangatet lima ka nung keno benteta ayutsü kecha tasak mali.
Laishiba tsütsü nungi reprangdangra, Yisuji Nazareth yimti nungi lir. Aser Yisuji Nazareth nunger süaka, tetsü Mary kinüngbo Joseph sülen anidaka aodang, kinü Yisuji Bethlehem yim nung aso. Ibaji ajanga, Yisuji Bethlehem yim nung aso ta tamanger ajongai jembir. Yamaji Christian tekülem kimongji tanübo Impur nung amenoker liaka, mezüng Christian tekülem kimongji Molungkimong 1872ji asütsü. Tsüraburtem nüchiso tenzükba mapang, pei kechi nung lidir ibaji center lir ta jembi ama, teti asoshi ABAM Center Impur nung memesemtet tashi Dr. Clark alidakji Christian Tekülem Kimongji mesüra centerji asütsüla. 1876 küm nungi Dr. Clark densema oa yim tasen Molungyimsen küma alibaji otsü nungji angashir.
Ni ABAM nung inyaker ka asünungbo, nibo Christian Tekülem Kimongji tesem asem nung azünga ayutsü ashitsü.
1. Molungkimong yimtak Mezüng Christian Tekülem Kimong (1872-1876)
2. Molungyimsen yimtak Tanabuba Christian Tekülem Kimong (1876-1894) aser
3. Impur ABAM Center Tasembenbuba Christian Tekülem Kimong (1894-till date).
Lepteptsüngtep putu mapang, yim ka kija ajungba agi shinga yim kümzüka melitet. Yim kati yim ka yaritep. Yim tilatemi yim tulu nung metaloker ali aser yim tila aliba ajanga yim tulu kümzüka, kati ka dak metalokteper yimaker nok nungi kümzüktepa, timtem temoatsü ajak nung amalitepa lia aru. Ni bushizüngdanga senzüba mapang, ni tajung ka ajitetbaji, Ao Ponemro Longkhüm aser Mangmetong dak alaka, lepteptsüngtep putu mapang pei pei yimer tamakoktemji aikati kibok nung jembiaka, yimjak nungbo mejembir aser odia mejembiteter. Saka pei pei yim tamakoklenjia yim shia otsüjibo mamai kar. Tanü tangatetba putu nung pei pei yimtsüng aser kidong indang tamakok aser takok otsütemji yimjaki adoka jembiyonga timtem malitsü amai bilemer aser aji nüngdaker. Lepteptsüngtep mapang Mangmetong nungerbo Longkhüm pusem oa noktakba, tanü tashi taidok meshitsü lenmang bushiaka menguteti tempangba otsü tashi lir.
Putu yimya ama Molungkimong aser Molungyimsen najia, yim kar dang tebu ajaba ajanga, yimji kümzüka arur alitsü. Mesüra yim tila kari yakyaka nungitba ajanga yimji kümzüka arur alitsü. Lepteptsüngtep mapang yim tulu aser netsüng nübu jenti aginüba mapang, yim balala akümbaji, yimya agi yimti nungji meputepba ajanga alir. Kodang yim ka nung yim ka arur jenokdir, tejenoker yim otsüji samar, saka kodang yim balala kümteta litetdir, pei pei ajungyim temeten kaadoker. Ashiko Molungkimong aser Molungyimsen najia, pei pei yim süngkümshi otsüji memedemra mesüra meputepra, item nümetong tembar yim tulu mesüra tila dangji asüngdanga opang ajemtsü kanga nüngdaka lir.
Koba aser shir kin keno tajungleni sümedema arudir, idakji yimchiyimjung teti alir aser mera tasen merateter. Tanü Christian putu taochi agi sünga aliba putu ka nung otsü taret küma bilemtsü lenmangji madoker. Kija tebilemba agi telok kodanga mabensar asünung, pei pei tebilemba maneni lemsatepra nübur asoshi tajangzük alitsü aser asütsü.