Aortem aser Football

– Akum Jamir, Kohima, MDFA life member.

India lima ajunga aser talisa Nagaland nung kodang football Otsü jembidir Dr.T.Ao  tenüng metetshiang football Otsü mejembiteter. Tsüngrem-i  asen Aorji tàngar dak alia meimbayong wadang balala ajunga nung samanir adokdaktsü, ajioda asaya balala (sports) nung Naga nunger rongnung rongnir jenti adokdaktsü. Aor dak football asayatsü sempet aser tejangraba tulu ngua küm 24 jakdang Mokokchung alir  senso kari Mokokchung District Football Association tenzük. Aji oda, 2017 Küm silver jubilee amongtsü sentong asameyangdagi. Mdfa nung achayangertemji kecha taa (fees) maka saka pei rongsen aser nubo indoka lanur asayar tajung adokdaktsütsü aser football meimertem asoshi sabang tajung lapoktsütsü nükjidong nung tenzüker. Aji oda, Mokokchung nungi football asayar tajung jenti adokdaktsüa parnok taküm piyong aji agi pei taküm aser kibong mesütsüsa lemang aika lapoktsüba den Mokokchung nem takok konang jenti bener arutsüogo. Football ya alima ajungai jangraba asaya ka lir aser Nagaland nunga tesem ajunga nung asayar saka tanga districttem talisa Kohima aser Dimapur amala Naga kin ajunga sentepa aliba tesem nunga teti football tournament alir. Oda lendong ken o adokti asübo iba ama tesem nung adoktsübaji kanga dang temela saka alimaji nubor tangatetba agi anir asünung, oda khenkhen timtem kar adokaka timi angatetepa tournamentji topur junga temdaktsür. Mdfa tournament küm 24 tashi asaya arudang tepang agi meshitettsüsa timtem jenti ajurua aruogo, ya koda asü ta aiben shisadanger. Tournament achayanger mesüra refereeji meimchir dang aser aseni parnok tashi maitji dang bushidi süra iba nungji shinga jenbua mali aser idakji tajung kodanga madoktsü. Asen Aortem, asen Lima ya koleni aoraka! Tanü asaya nung rongrong adokba indang jembir saka ya onük tila ka dang, Asen Aor maparen ajunga nung makmakshimak agi sünger ya koma asütsü, yamai dang Aortem alitsüna,iba amai dang ora shiba akoksatsü? Pi bendangertemi Aortem maparen ajunga nung samanirto mangmangadogo(confused) ta menüja jembir aser aji asen atema osang tajung masü. Asaya anena ataba asayashitsü ta angazük dang pelaa bilemer, kechibasera tournament ka metemtet ta asübaji alima nung otsü ka asütsü ta arendaka liasu aser yamaji süra jubileea koda amongtsü ta shisabolua liasü. Ao senso tajungtem, asen lima maparen ajak junga bener otettsü senso ajak khuret ta angateta senso tajungtemi pei shilem agidaktsüner kechiba süra alima ka alar tia aser tamakok jenjangi alutsüji maparen tilaka ajanga tenzüker. Tsüngremi Ao senso ajunga nem alima meimba tangatetba shisatsü agujangma ta sarasademer.