Kerala nung school 10,000 nung WiFi angati angutsü

Thiruvananthapuram, October 23 (Agencies): Kerala nung aliba lower primary aser upper primary sorkar school 10,000 nung state Foundation Day, November 1 nü nungi BSNL indang 2Mbps Wi-Fi broadband internet angati angutsü, ta Deobarnü ketdangser kati metetdaktsü.
IT@School Project-i 2007 küm nungi high schools, higher secondary schools aser educational office 5,000 shi nem broadband internet connection agütsüogo, ta state sorkar project director, K. Anvar Sadath-i ashi.
“Primary section schooltem nema broadband internet agütsüba densemabo state nung aliba school broadband internet network ajanga connection 15,000 tashi ayimjemtsü aser iba ya linük nung tulutiba aser tang mezüngbuba asütsü,” ta Sadath-i shisem.
State Education  minister, C. Ravindranath-i, iba mera agiba ajanga primary section nung ICT infrastructure upgrade asüba tenzüktsü, aser sorkari sangdongba high tech school programme ataloktsür asütsü. Iba ya ajanga class 8 nungi 12 tashi ICT tools tasen amshia upgrade asütsü, ta ashi.
“November ita nung lower primary school tem nem Edutainment platform nung renemba ICT textbooks ‘Kalipetti’ (Play Box) agütsütsü. October 24 nungi primary tesayurtem atema ICT traning tenzüktsü,” ta minister-i ashi.