Memelungtepibo UCC magizüktsü: Naidu

New Delhi, October 26 (Agencies): Bodhbarnü Information & Broadcasting Union Minister, M Venkaiah Naidu-i, ajaki memelungibo Uniform Civil Code (UCC) magizüktsü, ta metetdaktsü.
Uttar Pradesh assembly election atongtsü anasa BJP-i yimtenren tajangzük atema mangatettep onüktem benoker ta aitsüba dak sentakba nung Naidu-i, taruba assembly election nung yimtenren tajangzük atema BJP-i triple talaq, Uniform civil code aser Ram tekülem ki onüktem mamshitsü, saka terenlok onüktem nung party-i election nung tokteptsü, ta ashi.
Election nung yimtenren tajangzük atema item ama tongtibang onüktemji mamshitsüla, ta shia sorkar atema tongti otongdar, Naidu-i, BJP-i surgical strikes ji yimtenren  tajangzük atema amshir ta opposition-i aitsübaji sorkari magizüker, ta ashi.
“Sorkari iba (triple talaq) ya tamangba yimsü onük ka ama magir. Onoki Muslim nunger onüktem nung tiyongtsüi aiter ta ashitsü makok,” ta paisa ashi.
“Kasa Indian Parliament, yimtenren inyakyim ajangasa Hindu Code Bill, Divorce Act, Hindu Marriage Act, dowry aser Sati benshiba anentsü, item ajakji Indian Parliament-i inyaker,” ta Naidu-i interview mapang ashi.
Paisa, Uniform Civil Code ji ajaklen nungi melungtep nungang agizüktsü, ta ashi.
“Tang onoki common civil code mesüra uniform civil code nung o melemteper. Law Commission-i tasüngdangbatem (questionnaire) agüja nüburtem dang langzütsü asüngdangogo. Ajaki magizükibo  uniform Civil Code malitsü,” ta paisa shisem.