Mkg: 1 buba Inter-Club Badminton asayamong tenzükogo

Mokokchung nung 1 buba Inter-Club Badminton Championship 2016 tayonger, MDBA ketdangpur, asaya ketdangser aser tetenzükba asaya nung shilem agitsüpur, Golden Feathers Chungtia o The Shuttlers Chuchuyimpang asayartemi agiba arok noksa ka yangi angur. (Mokokchung, October 26)

Mokokchung, October 26 (TYO): Mokokchung District Badminton Association (MDBA)-i ayonger külen Mokokchung kübok Indoor Badminton Stadium nung 1 buba Inter-Club Badminton Championship 2016 asayamong tanü, Bodbar nü tenzükogo.
Mokokchung jila aser temeket yimtsüngtem nung tentetba asayatsü telok 6 nungi ajak agi asayar 104 tashi tan asayamong nung shilem agitsü renema lir aser parnok rong nung Golden Feathers Chungtia, The Shuttlers Chuchuyimpang aser Team Bendangsunep Mokokchung Pool A aser Longsa Sporting Club Mokokchung, L 4 Impur aser Native Shuttlers Mopungchuket teloktem Pool B nung densema lir.
Tan asayamong nung asayartemi Under-13 (U-13) Boys Singles, U-15 Girls Singles, U-17 Boys Singles, Men’s Doubles, Veterans 35+ Men’s Doubles, Veterans 45+ Men’s Doubles aser Mixed Doubles küma lemsatsüba tetoktepba shilem nung tetoktepa asayatsü renema lir.
Tan asayamong ya ‘Team Event’ yimya nung asayatsü aser ‘Best of 7 matches’ nungi takoker shimtsü renemba osanga angazükogo.
“Badminton sabang aser badminton asayar teloktem temaba jenjang nung ajungkettsütsü aser asayartem aniteta, parnoki peipok mesütettsüsa parnok saisapongdaktsütsü ajungmesotsü nükjidong nung tan mezüngsüa Inter-Club badminton asayamong ya ayongogo,” ta MDBA Tir, Er. Toshikaba-i metetdaktsü.
“Tarutsü mapang, 2040 küm tashi nungbo Mokokchung jila nungi Olympics nung shilem agitsüsa asayar takotet anitettsü alizüng lir aser iba alizüng asangsang nung ajangzüktsü atema MDBA-i saisapong sentong balala mapang shia ayonga agitsü sentong lir. Anungji, nüburtemi MDBA tanen makai nungitsü ajungshir,” ta ‘MDBA Vision 2040’ alizüng indang jembia, Er. Yanger Pongen-ia tesentepertem ayongzüka liasü.
Asayamong mapang kentener balala jaoka kentenmenü sentongtem agitsü aser asaya reprangtsü asoshi ticket jenjang sen 20 alitsü renemogo.
Tan October ita 27 nü asaya nikongdang 2:30 ako nungi tenzüktsü; October 28 nü nikongdang 4:30 ako nungi tenzüktsü aser October 29 nü nikongdang 2:00 ako nungi tenzüka, asayamong shibangba sentong agitsü.
Asayamong shibangba sentong nung taoba Nagaland Chief Secretary, Alemtemshi Jamir (Rtd IAS) tongti tesemdanger alitsü.