India-New Zealand tezüngzüktep 3 agi

New Delhi, October 26 (Agencies): Bodhbarnü Ato kilonser, Narendra Modi aser New Zealand Ato kilonser, John Key nati kulisüa India-i New Zealand linük den tezüngzüktep asem- saru anaben agiba paidoktsü, saisapong aser lanurtem nung amaliteptsü aser food safety nung amalitepa inyaksü atema FSSAI tsüngda tezüngzüktep agiogo.
Linük yimtiba nung aliba Hyderabad House nung senden ka amenba sülen tezüngzüktep asemji agi.
Küm pongu tsüngda John Key-i tang agi tanabenbuba India semdanger aser pai, India-i Nuclear Suppliers Group (NSG) züngsem akumtsü atema benokba nung New Zealand-i pusemer, ta metetdaktsü.
“Tekaratiba nung telemtetba tajung ka dangi arutsü atema New Zealand-i NSG züngsem linüktem den inyaktsü: Ato kilonser Key-i India NSG züngsem akümtsü pusemer,” ta Key-isa metetdaktsü.
“New Zealand aser India na tesentaktep junga lir, iba nungji shishilembaba mesüra cricket dena lir,” ta paisa ashi.
Key-isa, “India den tesentaktep ano tashi taitba akümtsü atema ozü linüki inyaktsü,” ta shisem.
Aji oda India UN Security Council züngsem akümtsü atema New Zealand-i pusemba atema Ato kilonser Modi-i Key dang pelaba lemsatep.
“UN Security Council nung permanent India züngsem akümtsü atema New Zealand-i pusemba atema pelar,” ta Modi-i ashi.
Ano alima nung kiralongraba anema linüktemi longjemer raratsü nüngdak ta shia Modi-i, “Alima yimjung raksatsüba tayongzükba tulutibaji kiralongra lir. Ato kilonser Key künati kiralongra anema security tashi itshitsü aser Intelligence nung amalitepa inyaktsü bangjemogo,” ta metetdaktsü.