NE nüburtemia Uniform Civil Code anema nokdaktsü: Owaisi

Hyderabad, October 27 (Agencies): AIMIM Tir aser Hyderabad MP, Asaduddin Owaisi-i, Uniform Civil Code ya Muslim nunger kija onük ka masü, saka North East  tesem aika nungi nüburtemia iba onük anema nokdaktsü, ta ashi.
Paisa, linük nung lokti temeyoktep balala aika tesünep nung aliba ya BJP-i raksatsüner, ta aitsü.
Hyderabad nung osangbenertem den jembidang Lok Sabha züngsem, Owaisi-i, “Uniform Civil Code (UCC) ya Muslim nunger kija onük ka masü. Iba onük ya North-east nüburtemi, talisa Nagaland aser Mizoram-ia anemtsü,” ta ashi.
Iba onük ajanga India nung nisung jenti shisabulutsü, kechiyong iba ya ajanga BJP-i linük nung tamangba lokti balala tsüngda tesünep nung aliba tembangtsüner, ta pai ashi.
“BJP atema, Muslim nunger ya tsükchir ka kümdaktsütsüla, koba ajanga iba onük atema parnoki sadema inyaktettsü,” ta pai ashi.
“Kechiba Hindu Undivided Family tajangzüktemji Khristan aser Muslim nunger nembo magütsür? Ibaji Khristan aser Muslims nema agütsütsüla. (Union Minister) Venkaiah Naidu-i, India nung tamangba ozüngtem malitsüla ta jembir süra Hindu Undivided Family ji kechi, Hindu Marriage Act aser Hindu Succession Act ji kechi, item ajak ya kechi?” ta paisa asüngdang.
Mangatettep aliba onük, UCC agizüktsü sentong yur Law Commission-i National aser state yimtenren party ajak dang iba onük nung parnok tebilemba lemsatepang aser benokang, ta shiogo.
Iba atema Lawe Commission-i party tem nem tasüngdangbatem (questionnaire) agütsüogo, aser telangzübaji November 21 nü tashi nung agüjang ta tuyuogo.
Yashi Urban Development and Information & Broadcasting Minister, Naidu-i, UCC ji ajaki memelungtepibo magizüktsü, ta jembia liasü.
Paisa, Uniform Civil Code ji ajaklen nungi melungtep nungang agizüktsü, ta ashi.
Naidu-i, “Tang onoki Common Civil Code mesüra Uniform Civil Code nung o melemteper. Law Commission-i tasüngdangbatem (questionnaire) agüja nüburtem dang langzütsü asüngdangogo. Ajaki magizükibo Uniform Civil Code malitsü,” ta metetdaktsü.