Ochiba aser Yimjung : T. Ken 85

Meimchir temulungjang nung aser alima nung yimjungji ne temoatsü Kibur. Nisung pa sasa den yimjung, pa kiyonger den, teyangluba ajak den aser ne den pa Master aser Kibur den. Yimjungji telok nung sünepa aliba aser temang ajunga sünepa aliba, kibong nung lungjema aliba aser lokti nung azükaru. Yimjungi lungjemdaktsür, jungtepshidaktsür, aneptsür aser tepela agütsür. Yimjungji alima ajunga nung kati ka dang pelaa agizükba oshi ajak nung jembiba oshi ka, tentet tentetba nükjitong den aser lokti senden nung jembiba olen. Yimjung raksatsü temela aser inyaktettsü tasak. Kotak tenyartemi yimjung osang sangdongaka idangyongjisa alima matong, kodanga kü mulung nung mamong.
Temeim aser yimjung külemi arur. Ochibai ana tsüngda tim temeten agütsür, aser ochibai Tsüngrem taochi agi tatok agüja tamakokji metendaktsür.  Yimjung jenjangji ochibaji lir.  Ochibai nisung tsüngda pei-pei shilemji shidak temzüktsür, ochibai Tsüngrem taochi agi tatok agüja tamakokerji metendaktsür. Ni kü taküm nung yimjung kanüra, ni ajak den ochi shia alitsü angazüktsüla, aser ni lokti nung yimjung lidaktsünera ni merangtsüla aser nisung tsüngda tesendaktep kadaktsütsü bushitsüla. Timtem aliba lima nung yimjung kadaktsütsübaji ochibai dang kadaktsütsü akok.
Laishiba nung nisung tajung dang ajaba tenüngji “ochi” agütsü. Ochi nung Tsüngrem tsüngdang, kü matsüngdang aser nisung ajak matsüngdang  ni kü mapa ataloktsütsü. Nisung ajak kü adianu aser adianutsür ama agizüka ajak nem pei temeten pelaa agütsütsü angatetta alitsü. Kü O nung aser kü tebilemba nung ochi alitsü. Idangji kü jakla aser mapa nung ajak den ochi alitsü aser ni aginüba ama ni “ochi” alitsü.
Idangji ajemrepa alidak ajak den kasa amshitsü aser kasa alitsü ni yimjak nung ayimoktsütsü.
Nisung rongnung telemsa aliba angatetta, tejangraba nung aser mapa nung kasa lia ochiba asoshi inyaktsü metetta alitsü sayutsü.
Idangji ochibai yimjung bener arutsü. Kü mulung nung ochibai kü tejangraba, kü tebilemba, kü tepela aser kü tejashi kotaker mapa tengujemtsü tim kasa nung angutsü, aser alima nung nisung rongnung Tsüngrem sempet, yimjung asangsang kümdaktsütsü. Ochi aser yimjungji temoatsü aser pa kolenisa odir idakji Kibuba atener.   Ochi aser yimjung aliba jagi Kibuba atenba kuli sayur.
Ochiba pa tejakdang aotsü aser pa tsüng meraba tejakdang yimjung alitsü Tsüngrem tenüng sangang. Amen.