Longleng nung NSCN-IM purtemi shisalemsatepba senden ka ayongzük

Dimapur, Oct. 27 (TYO) : Tang India government den NSCN-IM teloki Naga yimten tebilemtsü ken o latettsü jembia aliba onük dak sendakba nung taoba küm August asem nü parnok tsüngda tangatettep ken o yangluba onüktem benoka shisalemsatepba sentong ka yashi Bodbar nü Longleng nung NSCN/GPRN Phom Regioni ayongzüka agiogo.
Iba sentong nung MIP kilonser, V.Horam aser Cease Fire Monitoring Cell nung Convenor Kraibo Chawang na tongti o jembir liasü.
Iba sentong nung jembidang, taoba küm ana tsüngda India den Naga yimten ken o jembiba maparen nung takok ngua jembidagi aser joko tatembangsa telatetba kati arutsü ana nung lir ta V.Horami metetdaktsü.
“Taoba küm August 3 nü India government o NSCN-IM na tsüngda Framework Agreement ka yanglua aliba ya Naga yimten ken o latettsü asoshi tamendakdak ka asütsü,” ta paisa metetdaktsü.
Iba terenemba onük nung India o Naga nunger na kin balala ser külemi dang alitsü aser ka küboki ka aittsüla ta asüba ken o kenyongi malitsü, kechiyong India-i Naga nunger temeten angatetogo aser joko tatembangsa telatetba kati arutsü sentongtem renema lir ta NSCN lenirisa metetdaktsü.
Kasa sentong nung K.Chawangia Naga nungertemi aginü maginü ta masü saka yakta alima otsü melenshitsü, anungji iba temelenshiba maongkaji agizüktettsüsa Naga nunger alitsüla ta ayongzüka jembi.
Iba sentong nungsa telok rongnungi temetetnübatem asüngdanga liasü aser itemji tongti o jembirtemi langzü. Kasa senden nungsa Phom Peoples’ Council nung mendenbuba Wb.Chingan Phomi NSCN/GPRN teloki iba ama senden ayongzükba atema pelaba metetdaktsü aser India den Naga yimten asoshi jembiba ken o nung akok tashi nungittsü ta metetdaktsü.
Iba senden nung Phom Peoples’ Council, Phomla Hoichem, Phom Students’ Conference, PBCA aser GBs Federation teloktem nungi lenirtem dena shilem agia liasü.