Arrtsülen Pak Rangers 15 tepsetogo: BSF

Jammu, October 28 (Agencies): Hokolbarnü BSF-i, Jammu tesem nung International arrtsülen Pakistan nunger sepaitemi injang yokba meyiptsüdang BSF-i Pakistan nunger paramilitary sepai 15 kahsetogo, ta ashi.
Mortar shells aser automatic prangpong amshia Pakistan nunger sepaitemi nisung aliba tesemtem, International arrtsülen security posts aser Kathua, Poonch o Rajouri district tem nung aliba Line of Control nung injang yok.
BSF-i ashiba agi, raraba hadir amshibaji ajanga Pakistan nunger Army temi paramilitary Rangers tem pusemer.
“Yashi nikongdang 5:20 ako meta Pakistan Rangers temi Jammu nung aliba Kathua sector nung shells aser injang yok tenzük, iba sülen Hiranagar aser Samba nunga yok. Injang yokbaji tanep 5:00 nungang 24 BSF posts nung anen,” ta BSF ketdangser kati ashi.
Osangbenertem den jembidang BSF Additional Director General, Arun Kumar-i, “BSF-i Pakistan nunger sepai 15 tepsetogo. Onoki parnok indang (outposts) aika makdokogo aser kar raksatsüogo,” ta ashi.
Parnoki amshiba 120 mm mortars apibo, Pakistan nunger army temi Rangers pusemer ama reprangteter, ta paisa ashi.
“Pakistan nungeri mortar shell yokba ajanga Khour belt, Pallanwala sector nung nisung ka asü aser R S Pura sector nung ka yiru,” ta Jammu Deputy Commissioner, Simrandeep Singh-i ashi.
Iba den külemi Pakistan nungeri mortar shells yokba ajanga Poonch district kübok Gohlad yim nunga arishi küm 50 tantsür ka süogo, ta Defence otongdari ashi.