Referee Refreshers Course agitsü: KDVA

Kohima, October 28 (TYO): Kohima district nung alir referee inyaktsü temeten alirtem atema Referee Refreshers Course ka Kohima kübok Old KMC Office nung tentetba KPC Conference Hall nung taruba November ita 2 anepdang 11:00 ako nungi tenzüka agitsü renemba osang ka Kohima District Volleyball Association (KDVA)-i tanü sangdong ka ajanga metetdaktsüogo.
Tarutsü mapang ayonga agitsü renemba 4 buba Open Kohima District Volleyball Tournament 2016 atema terenemshiba agitsü nükjidong nung tan referee-tem atema terenemshitsü sentongji agitsü ayongba osang angazükogo.
Ano külen, 4 buba Volleyball asayamong asayatsüren lemzüktsütsü sentonga kasa anogo nikongdang 2:00 ako nungi tenzüka, KPC Conference Hall nungsa agitsü renemba olen ka lemsatepa, asayamong nung shilem agitsü tenüng benoka alir telok Team Manager/Coach-temi tsüngdong arua shilem agitsü mesüra par telok tenüng nung ketdangser kar yoka, iba sentong nung shilem agitsü metetdaktsüogo.