Onok nem gari lenmang tajung agüjang : T.R Zeliang

Hokolbarnü Chief Minister, T.R. Zeliang-i contractors, NHIDCL, Border Roads Organisation aser National Highways o Roads & Bridges ketdangsertem den senden amendang agiba noksa angur.

Dimapur, October 28 (TYO) : Nagaland Chief Minister, T.R Zeliang-i Hokolbarnü contractor tem aser department ketdangsertem dang gari lenmang tajung yanglutsü tetuyuba agütsü.
Dimapur-Kohima National Highway 4 lane dak sendakba senden ka contractors, NHIDCL, Border Roads Organisation aser National Highways o Roads & Bridges ketdangsertem den amendang, T.R Zeliang-i ashiba agi, nübortemi mapang shitak nung mapa tembanga inyakdaktsünüba dang masü saka lenmang jia tajung aginür.
“Nagaland nung mezüngbuba 4-lane project ji iba ya lir aser nisung ajaki nenok dak tenük yoka reprangdar” ta ECI aser Gayatri-Maytas firms nungi contractor tem dang ashi.
Highway nung ali anenzüka aoba tesemtem mesüra lenmang mejungi aliba tesemtem yangluba mapa tenzüktsüla. Ajisüaka, lenmang junga alidakbo traffic timtem majurudaktsütsü atema metangshii atatsüla, ta Chief Minister-isa parnok dang ashi.
“Küm aika BRO-i gari lenmang anenoka aiba aser anentsüh alubatem reprangshima arur aser parnok iba khuret asoshi mongin kümer ama ni bilemer” ta paisa shisem.
Iba mapa inyaktsü asoshi contract lemzüka alirtemi ashiba agi, parnoki lateta aliba mapang matongdang mapa tembangtsü alizüng yur inyaktsü aser mapa inyakdang traffic nung timtem magütsütsü merangtsü.
Ajisüaka, mapa inyaka aodang traffic senzütsü atema one-lane road dang akümtsüa akok aser iba mapang sorkari yaridaktsünür, ta parnokisa ashi.
Talisa, lung aliba tesemtem nungbo tapoktsütem amshia lenmang yanglutsüsa akümtsü aser dangjibo garitem minute 30 den tali anena atatsüsa akümtsü, ta parnokisa metetdaktsü.
Iba mapang Chief Minister T.R Zeliang-i, tetsükdaktsü melii mapa inyaka aotsü atema yariteptsü, ta nangzük.
Highway yanglutsü atema mezüng nungbo nisung kari memulungi ola adok saka item onük angatettepba atema Highway anasa aliba yimtsüngtem aser teloktem dang kanga pelar, ta T.R Zeliang-isa ashi.
Paisa, NHIDCL dang Maram (Manipur) aser Peren tsüngda aliba National Highway 129 indang osang asüngdang aser iba lenmang junga lira, Manipur leni aoba garitem Jharnapani nungi Peren-i aotsü aser idak nungjagi Maram-i aotsü junger, ta tebilemba ka lemsatep.
T.R Zeliang-isa R&B aser National Highways ketdangsertem dang Dimapur-Niuland-Zhadima Highway tia metettsü aser 4-laning yangluba mapang iba lenmang nunga garitem timtem melii senzütsü atema mejungi aliba tesemtem yanglushitsü atema tetuyuba agütsü.
Chief Minister-isa BRO ketdangsertem dang Botsa-Bokajan Highway tembanga yanglutsü atema tetuyuba agütsü.
Kohima aser Dimapur nung gari lenmangtem mejungi aliba atema chief minister-isa R&B, National Highways aser BRO ketdangsertem dang pei pei lemzüka aliba telongtet nung gari lenmangtem mejungi aliba yanglutsü atema tetuyuba agütsü.
“Tzünglu aruba ya yakta anentsü ta ni imlar aser gari lenmangtem yangdaktsünür. Memenui dang gari lenmang nung ongken alibatem atepbangang aser nüngdakba tesemtem nung blacktopping süang” ta Chief Minister-i senden nung adenertem dang ashi.
Dimapur-Kohima National Highway 4 lane yanglutsü atema mapa lemsaba nung Patkai College Junction nungi Piphema (28 km) tashi ECI telok nem, Piphema nungi Jotsoma Junction (14.2 km) tashi Gayatri nem aser Jotsoma Junction nungi Kohima adener Imphal-i aoba lenmangji BRO nem lemzükja lir.
4-lane yanglutsü atema teloktemi ashiba agi, parnoki gari lenmang anasa jungle clearing mapa tenzükogo aser November ita tanabuba hopta tashi nungbo nüngdakba osettem bener arutsü aser mapa inyak tenzüktsü.