Britian-i Calais nung jenoka alir refugee khuret abentsüla: Hollande

France anüdoklentip tsütsü, Calais jenokdak nungi aridokba sülen refugee telok kati Paris yimtiba northeast tsütsülen süki renemer idakji jenoka aliba noksa nung angur. (Paris, October 29)

Paris, October 29 (Agencies): Britain arrtsülen, France kübok Calais nung jenoka alir refugee nisungtem den sentakba khuret Britain linüki abentsü tajungshiba olen ka France Tir, Francois Hollande-i tanü, Honibar  nü metetdaktsüogo.
France sorkari bulldozer gari amshia, tzü arrtsü ajangda France toktsür Britain nung jenoka alitsü meranger refguee nisung 6000 dak tema jenoka alidak, France anüdoklentip tsütsü, Calais nung tentetba refugee jenokdak raksatsüba sülen par France aser kidangsüa aliba Britain linük na tsüngda tang mepelatep adoka lir.
“Britain sorkari Calais jenokdak jenoka alir refugee nisungtem talisa, tila tanurtem den sentakba khuret abentsü tajungshiba olen ka ni Britain Ato Kilonser, Theresa May den yashi telephone ajanga metetdaktsüogo,” ta Hollande-i tanü ashi.
Calais nung jenoka alir refugee nisung 5000 shi jenokdak melidaktsüi aridokba sülen iba jenokdak tsürapur malir tila tanur 1,500 shi aliba osang jangjaogo aser parnokji jenokdak tangai anir aotsü sentong lir.
Ano külen, par Britain sorkari Calais nung jenoka alir tila tanurtemji par Britain linüki anir oa anepalutsü renemba olen ka Britain Home Secretary, Amber Rudd-ia metetdaktsüba osang jangjaogo.
Britain nung jenoka alir refugee nisungtem den sentaktepa alir tila tanurtem Britain nung jenokdaktsütsü aser par Britain nung jenoka lidaktsüba ajanga taküm jenjang tajungba akümtsüsa tia ajurur tila tanurtema Britain nungsa jenokdaktsütsü ozüng ka European Union (EU)-ia lateta lir.
EU-i iba ozüng latetba sülen Britain sorkari refugee tila tanur 274 shi par Britain nung jenokdaktsüba osang bushitetogo.
Calais jenokdak nungi aridokba sülen refugee nisung 2,500 shi Paris northeast tsütsü süki renemer, parnok idakji jenoka aliba osang angazükogo.
Ajisüaka, Paris yimtiba nung jenoka alirtemjia Calais nungi aridokba ama aridoktsü renemba osang ka Hollande-isa metetdaktsüogo.