Taküm Diwali nung mopung temenenba asütsü

New Delhi, October 29 (Agencies) : Delhi nung tesüiba küm ana dang nungia taküm Diwali nung mopung temenenba asütsü.
Ministry of Earth Science nungi System of Air Quality and Weather Forecasting & Research (SAFAR)-i ashiba agi, linük yimtiba nung October 30 aser 31 anogotem nung mopung kanga balaka akümtsü. October 31, 2016 nüsa tamajungba asütsü, ta ashi.
Deobarnü, Diwali anogo nung Air Quality Index (AQI) 443 asütsü aser benjong sür tananü 472 tashi akümtsü. AQI 300 aser 400 tsüngdaji majung ta ashir saka 400 dak temaji kangasa majung.
Ajisüaka November 1, 2016 nü nungibo mopung tajungba küma aotsü, ta SAFAR-i takzüteta lir.
Mopung nung tzü peria lir aser mopung marakzüi alir, anungji firecracker nungi adokba mokozütemji yangji tsüngdentsü.
Tesem ajak rongnungia Noida mopung memerükba aser Lodhi Road, Delhi mopung temerükba asütsü.
AQI sashia akümba mapang nüburtemi kima yimdong nung kanga mesenzütsüla, ta SAFAR-i metetdaktsüogo.
Küm shia iba benjong mapang Haryana aser Punjab nung alu nung aliba monü aronger aser ibaji ajanga takümsa mopung tamajungba kümdaktsütsü, ta Delhi Pollution Control Committee (DPCC) nung Senior Scientist M.P. George-i ashi.