Tanaben asoba

Asenoki amangba Khristan yimsü nung tanaben asoba indang ya ajaki meteta lir saka tanaben asoba takümbo aikati majangshidangi alitsüa akok. Laishiba nung Yohan 3:3 nung Yisui ashiba tanaben asotsü nüngdakba yabo theology azüngba agi mangutsü aser arogo nung tenzükba agia majangzüktsü  saka Tsüngrem nem asen tanüla taküm ya bendanga agütsüba ajanga ajangzüker. Tanüla nung tanaben asoba yagi asenok tesamatsü lia Yisu Khrista temeim agi asenok kümzüker aser Pa den tesendaktep yanglur. Ibai taküm nung temelenshi tulutiba asütsü, kechiyong  2 Korint 5:17 nung ashir, nisung kar Khrista nung lira, tetezü shiba tanüla nung tanaben sodir, pa mesüra laji tasen poktetba temang aser tanüla asütsü. Kasa Laishiba jagi ashir, iba nisungbaji tera masü saka ajak tasen kümogo. Aji oda, nisung ka taküm nung kodang Yisu Khristaji pei kibur aser kümtetdakba ta kümdaktsüdir, iba jagi pei taküm jakla aser libaliro ajak melenshitsü, anungji pa mesüra laji akhi amato masü saka nisung kenyongi tasen ka amato asütsü. Aji oda, nisungbo kasa dang saka temulungjang aser tekolok kenyongi balaka küma melenshitsü. Anungji, akhidang tamajung bilemba to mebilemtsü , akhidang chia ajemba chiyongtsütem to kenyongi sempatsü, akhidang mazüoktetba jaklatem azüoktettsü  aser shisabolua aliba taküm to tepela agi asüngtsü. Tanüla nung tanaben masodangbo shi taküm nunga tangar dang akseta maksü aser tamakok agi sünger aliba taküm aser kibong asütsüa akok saka kodang asenok tanüla nung tanaben sodir, iba jagi asenok maksü nung akseta aliba tia nungi nümadangdanga alitsüsa taküm tasen akümer, kechiyong tanaben asoba ajanga Yisu Khrista temeimi asenok temenentem aika liaka, item ajakji nembanga yutsür. Yohan tapu 3 nungsa ashir, Yisu Khrista alimai aruba ya asenok temenenpurtem aitsütsü aser atakatemtsü aru masü saka kümzüktsü aru. Asenok asoshi Yisu Khrista alimai aruba osangtajung mezüngbubaji aji asütsü. Tashitemetter aser ozüng shitak benshiba Nikodemai tanüla tekümtet ya ozüng shitak benshiba aser tenla shitak agütsüba ajanga angur ta bilem. Pa taküm nung tanüla tekümtet angutsüba indang memetet aser majangshii liasü. Alima nung ozüng shitak amshiba kija agi tekümtet aser tepela mangur ta pai memeteti terata nung Yisu Khrista ajuru. Iba aonung Nikodemai tanüla nung tanaben asotsü nüngdakba indang angazük. Kasaji tanü asenok Khristan-tem aika tenüngbo Khristan saka Khristai asenok mekümzüktsüsa aliba takümtem lir. Tanübo iba ama taküm tiaji khen jungjunga bilemdangdi. Khristan-bo Khristan saka tatem nung Khristai asenok mekümzüktsüsa asenok lira asenok Khristan akümba tajangzükji kechi asütsü ? Kodang asenok tanaben asoba Khristan taküm ka alitsü tenzükdir, asenoki temenen mapatem sempatsü aser temenen mapa inyakba nung jangramatemtsü. Joko, tangbo asen taküm ya asensasa masü saka tanüla temeshii anitsü. Aji oda, asenok dak tamajung aliba jaklatem ajak melenshitsü aser asen agi asen memesük akümtsü. Atangji, iba ama taküm tasen ka ngua tangari süngmangtsü. Iba ama temelenshi taküm kaji nai nüsasa ajangshidanga lir mali ? Naia na Khristan ka ama Yisu Khrista den tesendaktep alibaji meteter asü ? Atangji, asenoki asensasa asenok ya Khristan tajung ka ama bilema alitsüa akok saka asenok taküm yimya nung tangari asenok dak Khrista akaba jakla balaka reprangtettsüsa mali tashi asenokji tanaben asoba taküm masütsü. Tanaben asoba aser masoba na taküm kasa asütsü makok. Shibasa tanüla nung tanaben soogo aser shibasa  Khrista nung tasen kümogo, pa mesüra lajibo tasen poktetba ta shia alinung, kasa tejen taküm asütsü makok. Tejen o tasen na balala, anungji asenok taküm tasenbaji tangari reprangtettsüsa alibaji anogo shia asenok mapa inyakdak tangar tsüngdang asenok taküm kuli asütsü.