Kidang mena yur jungdaktsüner

Nagaland nung alir ajaki Nagaland state government nung ochimashi mapa inyakba meteta dang lir. Ibai tanü tasen masü saka joko küm 40 shi Nagaland government inyakyim nung ochimashi mesen aliba agi Nagaland shirangdaktsür. Atangji, tamasabo ochimashi mapa ya awashi yimya tajung ka sayur ama tenzük südi saka oda oda küm 40 tsüngdangbo ochimashi mapatem ajanga nübortem asoshibo tagitarutsü kecha manüngtsüi ajak okshia agir. Aji oda, ochimashi mapa ya taoba küm 40 tsüngda oda Nagaland danga tuluba küma inogo. Atangji, ochimashi mapa inyak tenzükba ya kechalenia mao ser nung Travelling Allowance agiba agi tenzük asütsüa akok, mapai mao ser nung orr ama ita sen agizüka agiba asütsüa akok aser mapa meinyak ser nung tiyazü bill tilala yanglur sen agizüka agiba nungi tenzük asütsüa akok . Item tilateri mapa ama ka nungi tim masüba mapa inyak tenzükba nungi tanübo joko nübortem asoshi aruba teyari aser terenlok inyaktsüba sen rangben chiadoker. Ibayongji, Delhi nungi sen teimba -teimba yokyonga meperiba aser meperiba akümer. Ano, khen khenbo center sorkari Nagaland sentsüh ajak aodoktsüba mapanga tenjia aruogo.Ajisüaka, Nagaland-bo merenloker aser sentsühang teimba akümer.Nagaland government mapa nung aniokba yimya reprangdangra, mapa bushir lanurtem ajak nem kasasa maongka agüja tatidang agir shimtetba purtem agi kanga anünga lir. Iba amaji Nagaland nung terenlok mapa inyakba ajunga inyakpeter mesüra meinyaktet anendaka toktsür. Government nung ochimashi mapa onsara saka item ochimashi mapatemji pua anidaker opposition mali pei sünütsü süa yimsüsüba mapang talangka arudagi. Itemji nübortemi meteter aser angur saka kecha meshitetter kechiyong nübortem kanga tashimait aser government nung alirtem kanga tashitait. Iba ama tia nung mauyar aser magir takoksa ser ochimashi mapa anemabo ola adoker maliba ajanga Nagaland kanga mejungi raksadaktsüogo. Iba jagi tanübo government nunga inyakyim ka maka ama inyakertem ajak pei sünütsü süa odagi. Iba amaisa odaktsü nungbo kenü government senpong tazüng akümtsü aser government inyakyim ajak anenadoktsü. Idangjibo government anema apusoyonga government malitsü aser nisungtem arem shiruru ama pei ali liteptsüsa akümtsü. Iba amaji mataloktsü atem tanü putu nung alirtemi renemtsütsü nüngdaker. Tanübo tia junga telok tentet karibo government nung ochimashi mapa anema ola adoker. Item teloktem rongnung Nagaland Voluntary Consumers’ Organisation(NVCO) aser ACAUT na asütsü. Nagaland nung alirtemi iba lokti tentet ana dang yabo kangasa pelatsüla, kechiyong parnoki tasüa majem Naga nunger atema ochi tongpang raratsür. Aji oda, tang tashi nung Nagaland nung ochimashi mapa dang ochimashi maja sademsadema inyaka liasüba tensa tia nungi tazüokba jenjang kati anir aruogo. Parnoki police check gate nung policetemi ochimashi inyakba nungi tenzüka linük tenzükertemi saru onsara saruba, government mapai tezülen nungi yokba aser Food & Civil Supply deparment ajanga nübortem nem jangotsü agütsübaren nung ochimashi inyakba mapatem ajak kakteta nübortem nem metetdaktsüogo. Shitakba agibo, tai aser aibelen yimjak nung tuteta sayukaji joko itemji metongshidaktsütsübajibo nübortem khuret asütsüla, kechiyong item ajakji nübortem asoshi inyaktsür. Ibayongji NVCO aser ACAUT teloki nübortem dang parnok mapa nung tashi ajunga agi nungitdaktsüner. Ajisüaka, tezüdangtsükaji lokti senden ayongaka nübortemi marur. Asenbo temai madoktsü saka tangar dak temulung malemba otsü dang jembia kazütsü. Ibaji asenok dak kidang mena yur alima jungdaktsünüba jakla aliba ajanga lir. Asenokibo kecha meinyaktsü, kechaleni maotsü, nüngsena tilakata magitsü aser lendong alidaki kenyongi anasaia maotsü saka asen limabo ajungtsüla ta asenoki bilemer. Aji oda, asenok atep nung mena yur asen lima ajungtsü asoshi tangar kar nem inyakdaktsüner. Iba jakla aliba agi asenoki asen limai temelenshi bener marutetter. Asen lima jungnüra nübortem ajak pei kidang nungi adoktsüla, lokti senden nung adentsüla aser ochimashi anema kecha marendaki ola adoktsüla. Joko, asenok rongnung kati ka dak temulung melemtettsüsa melili aser ochimashiba anema raraba tongpang nung nia kechi tenlatsü ta bilema inyakdi.