US-i India nung tourism office lapoktsü

Washington, October 30 (Agencies) : India nung raliwali maparen tali tajungba küma ajungkettsütsü nükjidong nung United States of America kübok Nevada state-i New Delhi  nung tourism office tasen ka lapoktsü, ta ketdangsertemi metetdaktsüogo.
Iba office semzüktsü atema India-i mapuso tsüngda, Nevada Lt Governor Thomas Hutchinson-i, “India yimtiba New Delhi nung raliwali maparen tali tajungba küma ajungkettsü asoshi tourism office tasen ka lapokba ajanga international travel & tourism tsütsü Nevada kanga ajangzüktsü,” ta ashi.
Indian travel market nung Nevada-a share 6.5 nung densema lir aser kodang kanga junga asadangdir India nunger US-i arubaji yangi aliba kinungertem semdangi arurba lir, ta pai ashi.
“Onok tang Nevada nung India travel market share 6.5 ajanga kanga ajangzükdar. Iba den külemi ano tang India yimtiba, New Delhi nung office tasenba lapokba ajanga onok aliba tali jangjatsü aser iba jagi India nungi Silver State semdangtsü atema ajungmesotsü,” ta Hutchinson-i ashi.
Pai, India nungeri bendang lima sema jajadang küm nung sen dollar 5,451 intoker aser parnoki sen kanga tasak masüba hotel tem nung anener sadok sadoka shishilemba jajaner, ta ashi.