Lashkar-e-Taiba telupur 19 tepsetogo

Kabul, October 30 (Agencies) : Pakistan arrtsülen nungi kiralongra mapa inyaktsü osang kar angashiba sülen Kunar province anüdoklen aliba Dangam district nung anüng nungi amakdang tajemba agi Lashkar-e-Taiba telungpur 19 tepsetogo, ta Afghanistan sorkari metetdaktsü.
Dangam district kübok Airogoi yimtsüng nung yashi, Honibar nikongdang anüng nungi amakba mapang Pakistan nung amenoka aliba telungpur indang BM-1 rocket launcher ka aser machine gun ka ta anüka raksatsüogo, ta Afghanistan Ministry of Interior sangdong ka ajanga metetdaktsü.
“Lashkar-e-Taiba telungpur 19 tepset aser 8 yirutsüogo,” ta kasa sangdong ajangsa ashi.
Dangam district nung telungpur meshi meshia artoktsü atema tang operation kanga sashia agidar, ta sangdong nungsa shia lir.
Aji oda süaka sangdong nungji anüng nungi amakba osang tejangja aser iba inyakyim nung bendanger teloka dena ali asü maliar kecha shia mali.
Kidanger Nuristan province nungi 2014 küm Afghanistan anüdoklen LeT-i parnok tesep kümtettsü merangdar ta osang agütsüba sülen tang amakerba lir, ta Khaama osang ajanga metetdaktsü.
“Nuristan province kübok Kamdish district nung training camp lapoktsü atema LeT telungpur 100 dak tema aita aliba ketdangsertemi shiogo,” ta kasa osang ajanga ashi.
Osang ajangsa ashiba agi, iba telungpur telok yagi 2014 küm Afghanistan Herat province anüolen aliba Indian consulate amak ta tai tonglokja lir.