Cibulkova-i Singapore WTA Final nung takok nguogo

Singapore, October 30 (Agencies) : Deobarnü tan WTA final asaya nung Slovakia tsür Dominika Cibulkova-i tawa ang World No 1 jenjang nguter alila, Germany tsür Angelique Kerber madak 6-3, 6-4 agi kanga junga takok ngua asayamung marok benogo.
2014 küm Australian Open nung Cibulkova-i tanabuba jenjang nung takok ngua liasü, ajisüaka tan asayamung nungbo lai hopta ka tejakdang mokoki alila Kerber koka la tennis asaya tenzüker takok marok tulutiba Singapore nung nguogo.
Kerber-i taküm Australian Open aser US Open asayamungtem nung takok anguba sülen tan WTA final tongteta liasü. Ajisüaka arishi küm 28 tain, Kerber-i Slovakia tsürla menokdangteti tamakok angu.
Tan Singapore nung round-robin match ana tashi makokba ajanga Cibulkova tera agi asayamung nungi motugui liasü, ajisüaka lai iba sülen asaya asem tashi atonga akokba ajanga Billie Jean King trophy den sen million dollar 2.05 cheque ka angu.
Tarep final asaya nung Russia nungi Olympic champion Ekaterina Makarova aser Elena Vesnina nati 7-5 (7-5), 6-3 agi US Open nung takok ngua alir Bethanie Mattek-Sands aser Lucie Safarova na madak takok angu.
Tena nem Martina Navratilova Doubles Trophy agütsü.
Makarova aser Vesnina na külemi sür 2012 küm nung asaya arur aser tenati tarep asaya marok tenet tashi bena lir. Tenati takok anguba rongnung US Open, 2014 aser French Open, 2013 tem dena lir.