India-i Asian Champions Trophy nung takok nguogo

Kuantan, October 30 (Agencies) : India tebur Hockey team-i Asian Champions Trophy takok marok ngua tan Diwali kanga pelatepa mungogo. Parnoki tan asayamung final asaya Deobarnü Malaysia nung asayadang Pakistan madak 3-2 agi takok ngua iba marok aben. Tang agi India-i iba marok tanabenbuba abener.
2011 küm iba asayamung mezüng tenzükdang India-i takok marok angu ajisüaka 2012 küm final asaya nung India-i Pakistan makokba ajanga tanabuba jejangang ngutet. 2013 küma iba marok Pakistan-isa bena liasü.
Tan final asaya nung India-i tajungba asaya saka mezüng quarter nung telok anaprongi goal ka tanga meyokteti 0-0 nung tembang. Mezüng quarter nung mezüngbuba penalty corner agidang Jasjit Singh-i goal yoktsü maongka ngutet saka meyoktet.
Ajisüaka asaya tenzüker minute 18buba nung Rupinder Pal Singh-i tanabuba penalty corner nung aibelen mesüi India atema mezüng goal yoka 1-0 aküm. Mezüng goal yoker minute 5 sülen Ramandeep Singh-i agütsüba ball ka Affan Yousuf-i India atema goal ka yoksema 2-0 aküm.
Ajisüaka Pakistan-i penalty corner ka agidang Mohammad Aleem Bilal-i India nem goal ka agütsüba ajanga asaya tesadang tashi nung India 2-1 agi Pakistan tang tajungba liasü.
Iba sülen ano India-i kanga junga asayatsü tenzüka saka defender Sardar Singh-i tera mekümdangdang tasembuba quarter nung aser asaya tenzüker minute 38buba nung Pakistan nungi Ali Shan-i ano goal ka yoksema 2-2 aküm.
Pezübuba quarter nung India-i goal ana tashi agütsütsü maongka ngur meyoktet. Ajisüaka asaya minute 51buba nung Nikkin Thimmaiah-i India atema goal ka yoka 3-2 küma tan gold medal angutsü jenjang tongteta takok angu.