Sensaka alir nüburtem atema sen bn 140 endoktsü: China

Beijing, October 31 (Agencies): Sensaka alir nüburtem taküm jenjang tajungba kümdaktsütsü nükjidong nung tarutsü mapang, 2020 küm tashi nung dollar sen billion 140 shi endoktsü renemba osang ka China-i metetdaktsüogo.
Par linük tezülen sensaka alir nisung million 10 tashi indang taküm jenjang temaba jenjang nung 2020 küm tashi nung ajungkettsütsü alizüng yur China-i tan mapatongji tenzüker lir.
Tan teyari senji nisung alitsü ki, mozüki aser nüburtemi nungdakba kiojen renemtsütsü aser oda yuja aliba alimangtem amshitsü mapatong balala nung amshitsü renemba osang ka China’er National Development & Reform Commission (NDRC)-i metetdaktsüogo.
Iba teyari mapatong senji China Development Bank aser Agricultural Development Bank of China nati aputsütsü renema lir.
Bank anati teyari sen, yuan sen billion 341.3 tashi long-term yimya nung aputsüba den maneni sen billion 50-ji kiojen yanglutsü atema aputsütsü renema lir.
China sorkaria yuan sen billion 285.80-ji agütsütsü renemba osang jangjaogo.
Local sorkaria bond ajanga sen billion 100 agütsüba den Beijing yimtiba nung tentetba Central sorkari sen billion 80 shi agütsütsü renemogo.
China’er nütsüng yongsük nisung billion 1.4 noklang nung shilem 5 shi kanga sensaka aliba aser parnokji China tezülen küm nung yuan sen 2,300 den tekübokba aazüka aliba osang bushiteta lir.