Bengal tsür ka court-i au tongloktsüba agi soseta asü

Kolkata, October 31 (Agencies) : West Bengal kübok Jalpaiguri district kübok yimtsüng okadak (kangaroo court) kati au tongloktsüba sülen tetsür chanu ka maksü marem soseta asü, ta Hombarnü lar kinungertemi ashi.
District police-i la soseta asüba osang tejangja metetdaktsüogo saka iba tesem nung aliba okadang anema ano kecha ken o kecha maru ta ashi.
Jalpaiguri district kübok Bengupara yimtak Rajganj block nung alir aser Class 11 nung tezüngdak Pinki Khatoon ya Deobarnep lar kima aliba aurong ka nung soseta sür liasü.
Honibarnü yimtak aliba okadak-i lar kidang obendangdang panchayat lenirtemi lai cell phone auya ta tai tongloktsü liasü.
“Lai kidanger yim Bholapara nungi lai cell phone ka auya ta tiyazü tai tongloktsü. Iba okadak Trinamool party lenir-i anir panchayat deputy chief nungeri la dak azük aser phone ji meyipa magütsüra temerenshi angutsü amokmeren,” ta Pinki tebu tanubo Moslen Haque-i IANS dang phone ajanga ashi.
“Nisung aika jakdang la dak tiyazü tai tongloktsüba maksüji lai magizüktet. Iba okadak anema onoki police ket nung ken o benoktsü,” ta pai shisem.
Ken o benokba sülenang ozüngi melaba ama biushisüngdang mapa tenzüktsü, ta police-i ashi.
“Tetsürla ya soset asüba mesüka lir. Onoki la tasümang kanga junga tendangogo. Lai kechiba iba mera ya agiar onoki memetet,” ta Rajganj police station nung ketdangser tejen kati ashi.
“Tetsürlar kidang obendang agütsüba osang onoki mangashi. Lar kinungertemi ken o benok nungbo onoki bushisüngdang asütsü,” ta pai ashi.