Maharashtra nung maoist telungpur 5 temai adokogo

Nagpur, October 31 (Agencies) : Security force tem nem Diwali sempet angutsür amai, Maoist telungpur parnok nisung pungu (5) pei sasa bendanga agütsür temai adokogo. Parnok shibai pudir sen million 1.20 agütsü nangzüker liasü, ta Hombarnü Nagpur nung Gadchiroli police-i metetdaktsü.
Temai adoker parnok punguji arishi küm 23 tain, Karan (Dursa Peka Narote), arishi küm 23 tain, Pravin (Vilas Devaji Kolha), arishi küm 23 tain, Darju Kulle Usendi, arishi küm 30 tain, Raiji Nalgu Kaatvo aser arishi küm 20 tain tetsür, Sharda (Reena Vatte Pungati) nunger lir ta jangjaogo. Karan apuer nem sen 400,000 aser tanüngba parnok pezü apuer nem sen lakh anana agütsütsü nangzüker liasü, ta Superintendent of Police Abhinav Deshmukh-i metetdaktsü.
Narote ya 2008 June ita nungi maoist telok nung dena Gatta Dalam kübok tama inyak aser iba sülen December 2010 nungi Platoon No.14 nung inyaka liasü.
Narote telung nung küm 8 aliba mapang Dobur, Korpalli, aser Mirkal Phata tesemtem nung azü tokshitsüba aser nisung jenti tepsetba den sorkar anema mapa tamajung aika inyak.
Kolha-a 2012 küm nungi Kasansoor Dalam kübok inyak aser iba mapang Kundum aser Dobeguda nung nisung tepsetba mapa inyak.
Usendi ya 2014 nungi Kasansoor Dalam kübok mapang shia kümlemi inyaka liasü aser pai temai adoka metettsüsa ozüng alema mapa tamajung kanga tulu meinyakaka pa apuer nema sen 200,000 agütsütsü nangzüka liasü.
Chhattisgarh state nungi adoksang, Kaatvo-a 2002 küm nung Kaknoor Dalam kübok mapang shia külemi inyaka aru aser pa Vachhaghat kahsetba mapa aser Agmeta nung revenue department indang office tem raksatsür rong nung dena liasü. Pai tajemba agi nisung kabo tepsetogo aser tangar anema mapa aika inyakogo.
Tetsür Maoist, Sharda ya November 2012 nungi Gatta Dalam nung aden aser iba sülen Bhamragad Dalam-i yok. La Kucher nung security tepsetba nung dena liasü aser la apuer nema sen 200,000 agütsütsü nangzüka liasü.
Superintendent of Police Deshmukh-i, security temi maneni inyakba aser sorkar rehabilitation policy tem nung mulunglem sayuba ajanga item telungpur parnoksasa temai adok, ta ashi.
“Par pungu parnok sasa security nem bendanga agüja temai adokba ajanga iba tesem nung aliba Maoist telok kanga akoksaogo…Ano aikati azütokshiba mapa toktsür pei sasa temai adoktsü onoki imlar,” ta Deshmukh-i ashi.