Shingaia Sardar Vallabhbhai Patel melenzüktsü makok:Modi

New Delhi, October  31, 2016 : Hombarnü New Delhi nung Sardar Vallabh Bhai Patel tasoba anogo bilemteta amungba nüngtem nung ‘Run for Unity’ sentong metenzüktsü tsüngda Ato Kilonser Narendra Modi-i tenangzüba ka agiba noksa nung angur.

New Delhi, October 31(Agencies) : National Science centre, Pragat Maidan nung Sardar Vallabhbhai Patel sor küm 141 jungmung nung jembidang Modi-i, “Ni BJP nungi aser Sardar Patel congress nungi, ajisüaka ni pa inyakim aser tebilembatem sülen anidaker,” ta ashidang pai, “Shingaia Sardar Vallabhbhai Patel melenzüktsü makok,” ta shisem.
Sardar Patel-i linük atema tajung inyakba jembidang Modi-i, “Tetsür nem yimsüsüba menden nung maongka agütsütsü onük ya Sardar Vallabhbhai Patel-i mezüng benok, ajisüaka pai shidangbaji tamagitsü amai züktoka adok,” ta metetdaktsü.
Sardar Patel tasoba anogomung ya lokti balala ajak ka sür omen ka kübok amungba anogo ka lir. Indian Republic nguteter rongnung Sardar Patel-a ka liasü aser pai state tem ajak India union küboki anir ait.
Hombarnü iba sentong nung jembidang Modi-i linük rangben lungjemtsü indang ashi. Pai, “Sardar Patel dak kechi tashi balaka aliba agi linük nüjiso atema raraba mapang state tem lungjemtsü ashidang yimsüsürtemi pa tashi anga-ar bilemdangang,” ta ashi.
“Asen chirnurtemi Spain mesüra France nunger oshi kanga junga jembiba angashidang asenok kanga pelar, ajisüaka kechiba asen oshibo mejembiteter?” ta Modi-i asüngdang.
“Terenlok balala atema state balalai bendang linüktem den tesendaktep ayutsü mulunger, süra kechiba iba kasaji linük telungtet nungbo meinyakteter ? Kechiba state temi lungjemer linük renloktsü menangzükteter ? Asenoki ‘telungjem’ ya zübazüba agir aser ibaji ajanga lokti anemba mapatem nem maongka agüja asenok tsüngda telemsa adoker,” ta Modi-i ashi.