Loew-i 2020 tashi Germany Coach inyaktsü tezüngzüktep agi

Hamburg, October 31 (Agencies): Joachim Loew-i 2020 küm tashi Germany coach inyaktsü tezüngzüktep agishiba osang ka German Football Association (DFB)-i tanü, Hombar nü sangoktsüogo.
Taoba Germany manager, Sepp Herberger sülen anidaka, Germany football telok mapang talangtiba lenir tanabuba akümtsü alisang, arishi küm 56 tain Loew-i 2006 küm nungi tenzüka Germany telok aniba süen pa lenisüba kübok par Germany teloki 2014 World Cup takok marok agizüka liasü.
Par teloki taoba mapang shilem agiba asaya 141 nung ajak agi asaya 94 tashi koka, tongti asayamong 5 tashi nung semifinal asayatsü jenjang ajangzükba osang bushitetogo.
“Ozü Germany teloki 2014 küm Rio nung takok anguba ama, Russia nung 2018 küm asayatsü ayongba taruba World Cup asayamong takok maroka agizüktsü alizüng lir,” ta Loew-i metetdaktsü.
Loew-i mezüngbo 2018 World Cup asayamong tashi dang Germany coach menden abentsü tezüngzüktep agia liasü saka tan tezüngzüktep agishiba sülen pa lenisüba kübok par Germany teloki Euro 2020 asayamong nung shilem agitsü.
“Loew ya ozü Germany telok atema coach tajungtiba lir. Pa lenisüba kübok ozü teloki 2018 World Cup takok marok agizükba den külemi, Euro 2020 takok maroka agizüktsü imlar,” ta DFB lenisang, Reinhard Grindel-ia sangoktsü.