Palpreet 2016 NBA D-League asayar tarensen nung densemer

New York, October 31 (Agencies): India nung taküm 2016 küm February ita ayonga agiba National Basketball asayar bushitsü mapatong, ACG-NBA Jump National Finals nung takok angur, Palpreet Singh 2016 National Basketball Association (NBA) D-League Draft basketball asayamong nung shilem agitsü asayar tarensen nung densemba osang angazükogo.
US kübok New York nung agiba asayar shimtsü sentong nung arishi küm 21 tain Palpreet-i Brooklyn Nets telok tenüng nung NBA D-League 4 buba Round nung 11 buba asayar ama shilem agitsü temeten angu.
Aso tar feet 6 ser inch 9 talang Palpreet-i New York kübok Manhattan nung tentetba New York Athletic Club nung terenemshiba agiba osanga angazükogo.
“Ni Brooklyn Nets telok tenüng nung shilem agitsü temeten anguba atema kanga pelar. Iba ya ni NBA nung takok ngua shilem agi tetenzüker alitsü,” ta Palpreet-ia metetdaktsü.
2016 NBA D-League basketball asayamong taruba November ita 11 nü nungi tenzüka asayatsü ayonga lir aser iba asayamong nung asayatsü telok 22 tashi shilem agitsü renemba osang jangjaogo.