Angh & Chief Minister nati Naga nunger ayongzük

Nagaland Governor, P.B. Acharya aser Chief Minister, T.R. Zeliang  nati Hombar nü Zeliang nunger benjong Chaga Gadi aser Langstmnyi na NSF Solidary Park, Kohima nung amongba mapang tepela salem metetdaktsüba noksa nung angur. 

Dimapur, October 31 (TYO) : October 31, 2016 nü NSF Solidarity Park, Kohima nung Zeliangrong Baudi Kohima ajanga Zeliang nunger Chaga Gadi aser Langstmnyi benjung ayongzüka amung.
Iba sentong nung tongti tesemdangerji Nagaland Angh, PB Acharya liasü aser Chief Minister T.R Zeliang-i benjung kibur ama shilem agi.
Sentong nung Nagaland Angh, P.B Acharya-i o jembidang, iba ama tongtipang benjung ka nung pai shilem agitetbaji maongka ka ama züngshir, ta ashi.
India ya yimtsüngtem asoshi lir aser yimtsüngtem ajungketra, asen linük ajungkettsü. Asen linük nung yimti aser jilatembo renloka aoer saka yimtsüngtem nungbo terenlok ano matong lir, ta Angh-i ashi.
Asen sobalibaji asen indang maitsü lir aser tetsü oshiji kanga tongtipang lir. Ajisüaka, tanü putu nung tetsü oshitem samaa aoer, ta paisa shisem.
Sentong nung Nagaland chief minister, T.R. Zeliang-ia ashiba agi, lisopurtem indang benjung teimbaka tekong lu ayimba mongpu nung ajemdaker amunger aser benjungmung nung Tsüngrem nungi temoatsü meshir.
Benjungtem tetezü keta amungtsü atema benjungtem ayongzüka amunger. Anungji, asenoki mapa inyakba akhüm aser mapa meranga inyakba tangatetbatem tanaben lepa bener arudi. Naga nunger maitsü aser sobaliba wazüka ayutsü inyakyim tongtipangtem rongnung benjung amungba ya ka lir, ta paisa ashi.
T.R Zeliang-isa, “benjungbentsü ajanga kin sasep nung aser ano tanga kintem den tesentaktep akangshitsü aser longjemtsü atema ayongzüka amungtsü merangdi,” ta ayongzük.
“Asenok longjemba aser ka akümba ajanga dang Naga Yimten tebilemtsü ya timi aser ajaki agizüktettsüsa lemtettsü” ta paisa ashi.
Tanü agiba sentong nung Zeliangrong Baudi Kohima President, Kairinpibou Chnawang-i tesentepertem pela agizük, Zeme, Liangmai aser Rongmei cultural groups-i shilem balala agi aser ZBK, Advisor, Alan Gonmei-i anküp tepela o jembi.