Sen melen tzü !

Nagaland nung Sarva Shiksha Abiyan (SSA) tesayurtem nem May nungi September tashi ita pongo sen magütsüba agi timtem aremer maremtet Mongolbar nü Kohima nung adenshir parnok tangutsü aliba ita sen meshia longkak aitba sentong ka ayongzüka akadang, policetemi parnok dak mi ensepba gari bener aruagi tzü shilokja merenshibaji mashikoshi mapa ka inyakba asütsü. Atangji, tesayurtem dak tzü shiloktsür policetemjia temalen nungi yamaji inyaktsü ozüng agütsüba agi inyaker asütsü, ajisüaka tesayurtem  dak tzü shiloktsür policetem nemji government-i ita pongo ita sen magütsüra, parnokia kechikoma inyakla ta bilemdangtsüba mapangji tang asütsü. Ita sen achir ita ka sen mangu nunga timtem tulu ajurutsü alinung ita pongo tashi ita sen mangubajibo kiburi kilir asaa reshikangshirba asütsü. Mapa inyakdaktsür taa magütsübajibo meimchir temeten anema lir, anungji koba teloki yimsüsüba mapang südir süang, iba government anemajibo nübortemi ola adoktsüla aser government nung alirtemi nübor temetenji mezüngmeshi masütsüla. SSA tetezü tanurtem ajak nem kaketshisatsü angazükdaktsütsüla. Iba nükjidong atongtsü asoshi tanur arishi küm 6 tain nungi 14 tashi purtem ajak nem kaketshisatsü angati agütsür. Iba sentong asoshi tamasayongi center sorkar ket nung sen teperi lemzüka yuja lir, anungji SSA tesayurtem  nem sen magütsütet masütsüla. Nagaland nung government school majungba indang jembipet jembir aser jembi shiaji school ajungtsü atema tim teinyaktsü inyaktsü indang School Education minister, Secretary aser Director-temi kanga junga jembir. Ajisüaka, schook ki meyanglutsütetba, tazüngtsü kaket mapang shitak nung magütsütetba aser midday meal shitak metongtsütetba tamakoktembo yutsür tesayurtem nem ita sen magütsütetba tamakokjibo tesayurtem timtemdaktsüba dang masü saka tarutsü Naga lima dena raksatsür asütsü. Aji oda, tesayurtem nem ita pongo tashi ita sen magütsüba agi timtem aremer maremtet Nagaland ajunga nungi SSA tesayurtem adenshia Kohima nung ita sen meshia longkak aitbaji meima bilemtsü melen parnok dak gari bener arua tzü aintsü telemtetba agiba shisatsüji Nagaland meimba mulungjang nungi adokba shisatsü masü. Nagaland nung yimsüsür aser ketdangsertemi sen dak alaka kecha memeimer, anungji parnok asoshi tesayurtem sen mangu timatembaji kecha balaka masü, government school kidang jara maliyonga parnok asoshibo kecha mali, govt school kar nungbo tesayur agir magima aser kar nungbo tesayur peria mali ta asüyonga parnok asoshi kecha takoksa mali aser tang amai tesayurtem ita sen manguyonga parnokbo ita sen tupet atur aser mapang shitak nung angur, anungji kecha timtem mali. Aji oda, Nagaland nung yimsüsür aser tulurtem timmedemra kecha masü aser parnok chirnurtem tangalen school tajung nung züngtettsüsa ‘adjustment’ agidak ngura kecha masü, parnok denbo ajak junga lir ! Iba ama pei agitsü, pei ajungtsü aser pei asoshi dang bilemba shisatsü aser tekolok adenertemi yimsü asü tashibo nübortem kecha agia matatsü. Nagaland nung yimsüsürtemi Naga lima aser Naga nunger lanurtem meim asübo, tang amai tesayurtem nem ita sen magütsüba timtembo madokdaktsüla aser tang amai tesayurtem Kohima tashi arur ita sen meshia longkak aita amongdang, tzü agi ina meindoktsü merangtsü melen parnok timtemji angateta tonga orr parnok taginübaji ataloktsütsü merangla. Kodang yimsüsür aser tulurtemi pei lima aser nübortem memeim sen dang meima kümdir, parnoki school aser mozü ki majungba tia mangutsü aser mangashitsü. Kodang yimsüsür aser tulurtemi pei agitsü dang bilema  nübortem meyong rongsen penbudir, lenmang tamajung nung jajaba memetettsü, pei lima nung auyi ponga aser lishi mezüa senzüyonga maaktsü. Kodang yimsüsür aser nübortemi sen agi sen melentsü dang bilema yimsü südir, terenlok mapa inyaktsü asoshi kodanga sen makatsü aser inyakertem nem ita sen agütsütsüa manüngtsü. Ibaji shitak asü masüar tanü Nagaland tia den medemdangdi !