SSA tesayurtemi ita sen meshia longkak aiter; Sorkari tzü kahlokja senshidaktsütsü merang

November 1, 2016 nü Kohima nung Nagaland SSA  tesayurtemi DoSE kima lungkak aitdang sorkar ketdangsertemi parnok dak tzü kahlokja senshidaktsütsü merangba noksa nung angur.

Kohima, November 01 (TYO) : Ita tenet (7) jungnüa itasen magütsüba ajanga Nagaland Sarva Shiksha Abhiyan Teachers Association (NSSATA) kübok takoksa ajuruba tesayurtem, parnok 2600 shi adenshia tanü Directorate of School Education (DoSE), Kohima nung State sorkar anema longkak aitba shilem tanabuba tenzükogo.
Takoksa ajuruba tesayurtemi October 17, 2016 nungi yashi Hombarnü tashi mezüngbuba shilem nung primary aser middle school melapokdaktsüi longkak aitba sülen tanü, Monglubarnü nungi DoSE nung inyakertem office-i meyoki nokdanga longkak aitba tanabuba shilem  tenzük.
“2010 küm nungi tenzüker October 31, 2016 tashi sen agüjang ta memorandum aser temepishiba jenti agüja aruaka, sorkari kecha meinyaktsü aser ibaji ajanga tesayurtemi iba mera agitsüsa aküm,” ta takoksa ajuruba tesayurtem rongnungi ketdangsertemi ashi.
Longkak aiter tesayurtemi o zülu aser banner tem nung “Magütsü aliba itasen tama agütsür külenang ‘quality education’ indang jembiang”, “SSA tesayurtem ya sorkar alartem masü saka sorkar tenzükertem lir”, “Tesayurtem longkak aittsü tensa tarudaktsü”, “Tesayurtem mezüngshibaji education anema temenen” aser “Tenzükba mapa ka atema taküm alitsü nüngdak”, ta zülua amer parnok tangotsü tim itasen meshia longkak ait.
Aji oda süaka, tesayurtemi parnok ita sen meshia DoSE kima anepdang adenshidang district administration aser police temi parnok tashiyim agi senshidaktsütsü meranga mi ensepdang amshiba garitem bener arua, idak nungjagi tzü kahloktsü, saka tesayurtem iba jagi maoksai aser mesenshii anogo piyong longkak shitak aita amung.
Parnoki longkak aitba mapang School Education Minister, Yitachu-i SSA tesayurtem rongnungi ketdangsertem par kidang aliba office-i senden ka amentsü jaok aser parnok den Secretary & HoD of Education Department dena iba tebilemtsü dak sendakba jembishinütsü tenzük.
Ajisüaka, iba senden nung Yitachu aser Department ketdangsertemi tezüluba nung kecha magütsütetba ajanga iba senden nung telemtetba kecha magiteti tembang.
Anungji SSA ketdangsertem arok tesayurtem dangi meyipa ao aser parnok ita sen magütsü tashi ano asüng, Bodhbarnüa anepdang 8:00 ako nungi tenzüka longkak aittsü ta bangjem.
“Onok takhangba mataloktsü tashi kechi ajurudir ajuruaka renema lir,” ta tesayurtemi ashi.
Takoksa ajurur aliba tesayurtemi benoka aliba takhangba pezüji yamai:-
-Tesüiba ita 5 (May nungi September 2016) magütsüi aliba ita sen agüjang,
-2010-13 SSA tesayurtem indang ita sen non-plan revenue expenditure nungi agütsütsüla, kechiba süra onok ozüngi melaba inyakyim ajanga sorkar tenzüktsü (regular) atema shim,
-State sorkari ita sen memunutsütsü atema national mission SSA/MHRD, GoI-i tuyuba temzüng ozüng shitak nung anidaktsüla,
-Tesüiba mapangtem nung onok nem ita shia State fund nungi ita sen agüja ata aser Centre-i sen agütsüdang State fund nungi agia aliba sen meyipa agiba ama tang-a kasaji inyaktsüla.
Aji oda süaka, tanü Minister den senden amendanga sorkari mulunglem o mesüra tenangzükba kecha magütsütet, anungji onoki maneni longkak aittsü lemtet, ta SSA ketdangsertemi ashi.