Chi shitak angutsü !

Linük nung tanur ajaki zülutsü aser azüngtsübosa metettsüla, anungji tanur ajak nem kaketshisatsü angazükdaktsütsübaji center government nükjidong lir. Linük nung government-i atongba sentong tajungtem rongnung tajungtibaji ya ka asütsü. Iba nükjidong atongtsü asoshi center government-isa school tanurtem nem school-i aoba anogo shia school nung anüngdang chiyongdaktsütsü sentong tenzüka lir. Iba sentong dangji ‘ Midday meal’ ta ajar. Tanurtem asoshi aji koda jangratemtsü, anungji tanur ajaki school-i onüseta aotsü. Takar aser tulurtemibo bilemaka maittsü akok, saka linük nung tanurtem aika anepdang chiyongtsü makaba agi school-i moutetba purtem aika lir. Item tanurtem rongnung Nagaland nunga tanurtem aika chiyongtsü junga machiba agi temang tekongra aser tashimait kümer school-i oaka tangar pur medemer memeneptetba tanurtem aika lir. Item tanurtem asoshi shi ango meliaka chi den dal aser alo enoka chiyongdaktsüra ibaji teperi. Iba jagi parnok temang metetmeteta shia arutsü aser medemertem den kasa kaketshisatsü angazüktettsü. Ano, kasa timtemertem rongnungsa süaka oagi Nagaland anüdoklen alir kintem rongnung kibong aika makamaitba agi pei chir school-i meyoktetba tsürabur aika lir. Iba ama timtemji koktettsü atema government school lapok aser yangji azüngertem nem tazüngba kaket angati agütsür. Ajisüaka, ano kidang tanurtem chiyonger school-i meyoktetba tia nung tsüraburtem aika aliba agi, temeimtsüka tanurtem aika angati agütsüba kaketshisatsüa dena mangazüktettsüba tia nung lir. Item purtem asoshi ‘midday meal’ sentong ya Tsüngremi yokba teyari ka asütsü. Ajisüaka, tejashitsüka aser tezüdangtsüka kaji, asen lima nungbo iba chiyongtsü yaa anogo shiabo magütsütetter. Ibaji Tsüngrem aser nisung tsüngdang dang masü saka tanurtem tsüngdangji taaktsüka lir. Tangaribo sensaker, shiranger, timtemer aser nüngdakba purtem asoshi peisasa inyaker ajangzüktetba rongsen nungi tenla agütsür saka asenokbo tangari timtemer, sensaker aser shirangertem asoshi yokba nungi miimzüka agitsü meranger. Pi o asen na tetsüngdaji aji lir. Nagaland nung item ama tapok aika lir aser item tapokji matang tashi sensaker aser tilartembo kecha agia matatsü. Iba nüngdakji meteta tang Tuensang district nung class 1 nungi 7 tashi pur ajak nem anüngdang ‘midday meal’ chiyongdaktsütsü asoshi Eleutheros Christian Society (ECS) aser School Education department na tsüngda tangatettep onük kar renemba osangji ajak atema tepelatsü osang tajung ka asütsü. Tangbo timtem aser mekokmein aika aliba ajanga Tuensang district nunga school tanurtem nem school nung anüngdang chiyongdaktsüba mapa ya shitak meinyakteti alitsüa akok. Ajisüaka, ECS telok ama kati sorkar nungi temelaba meshizüker tangatettep nung tanurtem nem school agi shia anüngdang chiyongdaktsütsü mapa meshizükbaji kanga junga inyaktettsü. Aji oda, Tuensang district nung alir tanurtem asoshi balaka ibaji osang tajung ka asütsü. Atangji, India nung tesem kar nungbo anüngdang school tanurtem nem chiyongtsü agütsüba ya telok kar nem agütsüdaktsü tenzükogo. Aji oda, tanur meyirijang aika anogo shi chiyongtsü awazütsüba maparenji tasak saka light nung melamelaa awazüa agütsütettsüsa parnoki yanglua lir aser chi aon ajak mener diffin box nung enoker tatsük talem lema chidaktsür. Iba amaji Tuensang district nunga inyaktsü imlar. Iba nung jagi tenzüker Nagaland ajunga nung Public Private Partnership (PPP) inyakyim nung Tuensang district nung ECS teloki school tanurtem nem midday meal agütsüba ama yakta tenzüktsü imlar. PPP tetezü Government o Private na külem ser nübortem asoshi inyakba sentong lir. Aji oda, Government-i  nüngdakba oset aser sen agütsütsü aser private-i itemji amshia nüngdakba purtem tongtsütsü. Iba inyakyim jagi nisung aika mapa angur aser jungjunga takok  ngua inyaktsü meranger aser iba inyakyim jagi nüngdakba purtem pei shilem shitak angutsü.