UEFA Champions League: Manchester City & Arsenal nati akok

Paris, November 02 (Agencies): Germany midfielder, Ilkay Gundogan-i goal 2 agütsüba densema, par Manchester City teloki goal 3-1 agi Barcelona telok madak takok ngua, UEFA Champions League asayamong nung yashi, Bodbar nü shilem agiogo.
Yashi asaya nung Lionel Messi-i goal 1 agüja, Barcelona telok temaba jenjang nung ajungkettsü.
Iba goal-ji Messi-i Champions League goal 90 buba agütsür liasü.
Ajisüaka, Raheem Sterling-i yanglutsüba ball agizüka, Gundogan-i asaya mezüngbuba shilem tembangtsü minute 6 anüng alidang par City telok tenüng nung goal 1 agüja, par telok anaprongla kasa jenjang kümdaktsü.
Asaya tanabuba shilem tenzüker minute 6 buba nung Kevin De Bruyne-i free-kick takok ngua metsüokja, par City telok maneni temaba jenjang nung ajungkettsüba sülen Gundogan-i tasembuba aser takokba goal agüja, par City telok nem takok ngudaktsü.
Ano külen, Mesut Özil-i takokba goal agütsüba densema, par Arsenal telokia goal 3-2 agi Ludogorets telok madak takok ngua, tan agi Champions League asayamong pre-quarterfinal asayatsü jenjang 17 ben buba ajangzüka liasü.