Pak-i shells yokba ajanga J&K nung nisung 25,000-i ki toktsüogo

Jammu, November 02 (Agencies): Tesüiba hopta ishika tsüngda Pakistan nungeri injang aser shells yokba ajanga India nung civilian 11 densema nisung 19 tashi asüba sülen Jammu & Kashmir kübok arrtsülen aliba jila aser yimtsüngtem nungi nisung jentii pei ki toktsüogo.
Jammu, Samba, Kathua, Rajouri aser Poonch districts kübok International Border (IB) aser Line of Control (LoC) anasa aliba yimtsüngtem nungi yimtaklir 25,000-i ki toktsür ogo.
Osangbenertem den jembidang Divisional administration ketdangser kati, “International arrtsülen aliba yim 120 aser LoC anasa aliba yim 47 nungi nisungtemi pei toktsür ogo,” ta metetdaktsü.
Divisional Commissioner, Jammu, Pawan Kotwal-i, yimtaklirtemi ki toktsür aobaji khen atema dang lir, kechiyong anüngdang parnoki ki toktsür aor aser aonungbo meyipa arur, ta ashi.
Kotwal-isa, Pakistan-i injang aser shells maneni yokba sülen ketdangsertemi International arrtsülen aliba jila aser yimtsüngtem nung school 300 shi shibangja lir, ta ashi.
Taküm Pakistan nungi kiralongrartemi Uri nung army camp ka maka sepai 19 tepsetba sülen India-i mangyanga LoC nung kiralongrar tesep tenet makdok, iba mapang nungi tenzüka Pakistan-i 2003 küm agiba ceasefire tezüngzüktep alema injang aser shells yokba manener.