Glamour Magazine-i Bono ‘Man of the Year’ shim

New York, November 02 (Agencies): US nung adokba Glamour magazine-i Ireland nunger rock kentener, Bono par ‘Man of the Year’ shima, tetushi agütsüogo.
Glamour magazine-i kümshi shima tushiba ‘Women of the Year’ tarensen nung küm 36 tsüngda nung tan mezüngsüa ‘Man of the Year’ shima, U2 kententsü telok kentener aser meimchir temeten atema nokdaksang, Bono nem tan tetushi tulu agütsür lir.
Glamour magazine-i tetsürtem nem dang tetushi agütsütsü nükjidong nung taoba mapang tebur ka nem danga tetushi magütsüi aru.
Ajisüaka, “Alima ajunga nung tetsür aser tetsür chanutem nem temeten agütsütsü asoshi bendanga agüja nokdaker tongti kentener ka nem tetushi agütsütsüji tapet maparen ka lir,” ta shia, Glamour magazine-i Bono par 1 buba ‘Man of the Year’ shimba osang metetdaktsü.
Kaketshisatsü bushitsü, temang anema alitsü teyari agütsütsü aser shishilembatsü maongka agütsüba ajanga alima ajunga nung kanga dang sensaka alir tetsürtem taküm jenjang tajungba kümdaktsütsü nükjidong nung arishi küm 56 tain Bono-i ‘Poverty Is Sexist’ mapatong 2015 küm tenteta, tetsürtem yariba osang bushiteta lir.
Africa nung sensaka alir aser tashidak balala agi tonga shirangertem yaritsü nükjidong nung pai yarisema 2004 küm tentetba ONE tentet den sentaktepa, Bono-i yaküm ‘Poverty Is Sexist’ mapatongji tenzüka liasü.
Glamour magazine-i par ‘Women of the Year’ naroküm atema U.S. kentener, Gwen Stefani; America’er tetsür Olympic gymnast, Simone Biles; Black Lives Matter tenteter 3; International Monetary Fund lenila, Christine Lagarde; America’er pop star, Zendaya; Italy tsür designer, Miuccia Prada; Yazidi tsür human rights activist, Nadia Murad aser plus-size model, Ashley Graham nunger shima lir.
US kübok Los Angeles yimti nung sentong tajung ka tan November ita 14 nü agia, parnok nem tetushi agütsütsü renema lir.