Ladakh nung China o India sepai na rara adoktsüsa lir

Leh/New Delhi, November 03 (Agencies): MNREGA scheme kübok irrigation canal ka yangluba tesemi People’s Liberation Army (PLA) sepaitem aita mapa inyakba nokdangba sülen Bodhbarnü nungi tenzüka Ladakh division nung aliba rürjep tenemlen China nunger sepai aser India sepaitem tejak chitepa rara adoktsüsa lir.
Leh nungi kilometer 250 shi pilar aliba Demchok sector nung yim ka aser ‘Hot spring’ sendakteptsü atema India sorkar indang Mahatma Gandhi National Rural Employment Guarantee Act (MNREGA) scheme kübok mapa teinyakdak lir.
Yashi nikongdang China nunger sepai 55 shi iba tesem jagi arua mapa inyaka alibaji anendaktsü, ibayongji Indian army aser Indo-Tibetan Border Police (ITBP) sepaitem iba tesem jagi ilonga aruba sülen China sepaitemi ambangyima inyakbaji nokdang, ta tanü ketdangsertem osang ka ajanga metetdaktsü.
Iba sülen China sepaitemi Line of Actual Control (LAC) nungi iba mapaji anentsüla, kechiyong ibaji inyaktsü atema linük anaprong dang nungi temelaba agitsüla, ta ashi.
Ajisüaka India-i ashiba agi, linük ana tsüngda tezüngzüktep agia aliba apibo iba tesem nung defence terenlok mapa asü nung ang linük ana tsüngda osangji lemsateptsüla.
Sepai anatsülen nungi ozülu bener nokdaktepa lir aser Army o ITBP sepaitemi China nunger inch kata arutsü memelar, ta osang angazüker.
Tang iba tesem nungji China nunger PLA sepai 55 aser Indian army o ITBP sepai 70 shi iba tesem nung tejak chitepa lir.