Nai sen meshiba to koda ?

Tang Nagaland nung tejembidak rongdak nüngdak kaji Election timi agitsüba indang ya lir.Atangji, Nagaland nung election agitsüba ya shisabolutsüka kechiyong Tsüngrem aser nisung matsüngdang tim masüba mapa ajak election nung inyaka aru. Ibayongji, tang amai election atongtsü anasa electioni aitsü purtemang shisatebuluba aser nübortemang shisatebuluba ta buluteper. Aji oda, taruba election nungibo asen lima nung election timi shitak agitettsü asoshi arogo aser lokti tentettemi nübortem den jembi tenzükogo. Item denji külemi ano tajung kaji, jilushi aiba ajanga maparen tapu balala nung nübortem nem tangatetba agüja jajartem lanur telok ka tenüng agi  Dreamz Unlimited lir. Item telok yagi tanü asen loktiliba nung timtem takoksa ajuruba aser tarutsü Naga nunger tia indang bilemdanga jilushi ia sayur. Item jilushi rongnung parnoki Nagaland nung election timi magitetba tebilemtsü indang ka yashi Dimapur Govt. College pur Golden jubilee amongba sentong nung Chief ministeri anir yimsüsür, tesayur aser kaketshirtem aika jakdang ia sayuogo. Tanü asen lima nung nübortem asoshi tebilemtsü kaji candidate-temi election mapang nung nübortem asoshi mapa tajung inyaktsütsü nangzüker saka meinyaktsür. Iba jagi tanü asen lima  nung asenok gari lenmang tamajung nung jajar, mozü kidang taneptsü mangur aser school nung shisatsü merenloker. Ibaji dang masü saka ano lanurtem rongnunga tazüngertema mapa mangur aser mazüngertem inyaktsüa mapa maka kazüteper. Ibayongji timtem marem nisungtemi pei minister aser MLA bushia oagi mapa meshir aser mepelaba metetdaktsür. Ajisüaka, nisungtemi pa dang aruagi teyari meshidang minister aser MLA-ba mulungjang nung election mapang asenoki pa dang nungi sen agiba to dang arur aser meima bilemtsü melen jashir. Aji oda, election nung endokba sen to menoktsü atema minister aser MLA-ba to agi nübortem asoshi terenlok mapa inyaktsü atema aruba sen nungi luzüka agitsü meranger. Tamalenbo, yimsüsür aser ketdangsertemi nübortem meyong sen ya teputet ajema miimzüka agitsü merang saka tanü asüngbo odia agir aser nübortemia aji shitak inyaker amai bilemer. Ano, tarutsü lanur lima asoshi ajisa tamajungtiba. Dreamz Unlimited puremi aiba jilushi nung nisung anati par MLA-ba dang oagi pai election nung government mapa agütsütsü nangzük saka magütsü,  anungji ibaji oagi nenshia meshi, saka par MLA-bai tena dang election mapang nenoki sen aika meshia agiba to koda (?) ta dang asüngdang. Iba amaji tanü nübortem pei minister aser MLA dang teyari meshitsü aor saka yaritsüba olen to masü saka election nung sentsü atsühba indang otsüang talangba jembir. Yimsüsürtem rongnung shiba südir süang tang ya nübortem den terenlok mapa inyaktsü sentong kar indang jembir masü saka election nung atsühba sentsü maotetba indang dang jembia angashitsü. Aji oda, nübortemi angateter asü mangatettar ashitsü makok, saka yimsüsür kati kodang election sentsüh indang jembidir, pai asenok dang asenoki pa dang meshia chitsüba sen to koda (?) ta asüngdanger ta bilemdi. Aji oda, kodang yimsüsür kati election sentsüh maotetba  tebilemtsü indang jembidir, asenoki pa dang meshia chitsüba sen to pai mamai jembir ta metetdi. Iba tia nungji asenoki yimsüsürtem yutsür. Atangji, election nung sen aika endokyonga, iba tenüng nung nübortem asoshi terenlok mapa inyaktsü aruba sen mapa meinyaki agizüka achitsü makok. Aji oda, election sentsü maoteti aliyonga, nübortem asoshi inyakba mapa ajak nung shilem ka luzüka agira, ibajiang ano tai tuluba asütsü. Nagaland nung alir nübortem yabo tamachi amai lir, parnoki parnok asoshi government-i lenmang meyanglutsüyonga, mozü ki aser school ki shitak anepalu masüyonga aser light marudaktsüyonga, parnok lema agitsü asoshi sen tera ra ngura ojang ta bilemer. Iba jagi item rongsentemji ken nung chimarbo tachitsü maka timtemba kibong aika lir. Senso ka asoshi teinyaktsü ajunga agi  peisasa pei nümadangteta alitsübaji lir. Anungji, tang nungibo tangar dangi teyari meshii aodang “nai chitsüba to koda ?” ta masüngdangtsüsa asenok alitsüla.