Na kümzüka lir ma ?

Nai Tsüngrem dak imlaang; kechiaser ni  Pa tanaben asangtsü, kü teyari aser kü Tsüngrem.  T. Ken 42:11
Asen dak nungi tajungtiba agitettsü asoshi Tsüngremi asenok dangi timtem mapang yoker.  Yangi ken zülur timtem mapang ka ajanga aoba indang zülur. Pai tenem nungi lisem limai aser lenten nungi Yordan ayongleni jena aotsü mapang ajuru.  Pa mulungjang atentena liasü (t. 6).  Pa tanela pa dak süngjema mali asü. Saka pai pa tanela ajungshi aser pai Tsüngrem dak imla. Amangba jagi asenok tia (mapang) ajanga aor. “Kechiaser ni Na asangtsü.” Iba yagi teimla jakdaka sayur.
Amangbaji timtem liaka Tsüngrem dak amangba sayur, tammang tia nung amanga, reshikangshi nung pelaba, tipmatem mapang nung Tsüngrem tenangzükbatem nung amangbaji tera ayangba! Amangbaji tera süra, tenüng asangba jagi amangbaji tera akanga ludaktsür. Tanü nai mepelaba kar ajurura, mepelai teli. Temulung tangang aser Tsüngrem dak amangang. Nai kü dang asüngdangra, “Ni koda Tsüngrem dak amangtsü?” Idangji ni Dawidi inyakba ashitsü: aji saka Pa sangang. Shiranga lir asü, Pa sangang. Tanü renemtsüba mapa nung tebenja adoker asü, Pa sangang. Ajak junga alidang Tsüngrem tenüng asangbaji pelaba lir. Mejungi aodang Tsüngrem tenüng asangbaji tsüngchiba lir. Iba ama nisung angudang Tsüngrem tejak sangwar, aser Tsüngremi ne tejak maksü nungi kümzüker. Dawid dak ibai atalok. Tsüngremi pa tsükchirtem akok aser pai sama aliba ajak meyipa ngudaktsür (2 Sam. 18:15-17). Atangji kasaji ne meyong. Nisung dak amangba amajok. Tsüngrem dak amangang.