PM Modi-i yazü jembir, OROP mapa küma meinyak: Rahul

New Delhi, November 04, 2016: Hokolbarnü AICC headquarters, New Delhi nung OROP onük nung senden tatsü ka amenba sülen Congress tatong Tir, Rahul Gandhi-i osangbenertem den jembiba noksa nung angur. Kasa noksa nung taoba mapang Union Defence Minister, A K Antony aser state balala nungi Ex-Servicemen tema angur.

New Delhi, November 04 (Agencies): Hokolbarnü Congress tatong Tir, Rahul Gandhi-i, Ato kilonser, Narendra Modi-i One Rank One Pension (OROP) scheme atema yazü jembir, ta aitsü.
Delhi nung longkak aiter ex-servicemen ajuruba sülen osangbenertem den jembidang Congress leniri, “Ato kilonseri ajaba OROP ya OROP masü, saka pension tajungba kümtsüba dang lir.  Anungji Modi,  yimlibilema yazü jembiba anenang aser OROP mapa küma inyakang,” ta ashi.
OROP onük nung Rahul Gandhi-i Modi’er sorkar anema kanga jembidar, aser ex-Army Ram Kishan Grewal soseta asüba dak sentakba nung pai, “OROP ya sen indang masü, saka iba ya asen sepaitem nem akhüm agütsüba aser asen sepaitem nem ochi temeten agütsüba indang lir,” ta ashi.
“Ato kilonser Modi-i OROP mapa küma inyakogo ta jembir, yamaji süra kechiba ex-servicemen aikati taoba anogo 509 tashi Delhi nung aliba Jantar Mantar nung longkak aiter?” ta Rahul-i asüngdang.
Rahul-isa Centre dang UPA sorkari nangzükba mapa küma inyakang aser tekaratiba nung OROP mapa küma inyakang, kechiyong ibaji linük atema taküm tenlar, sepaitem temeten lir, ta takhangba agütsü.
OROP onük nung taoba mapang sepai ka asüba sülen Rahul Gandhi, Delhi Chief Minister Arvind Kejriwal aser tanga opposition lenirtemi Modi sorkar nem tai tongloktsüdar.
Taoba anogo ana tsüngda Congress MP Rahul-i sepai soseta asüba anema longkak aittsü tenzükdang pa anaben tashi nokdangogo.
Iba tatalokba ya yimtenren ken o ka kümdakja Brihostibarnü Rahul aser Kejriwal nati Haryana, Bhiwani semdanga Grewal asüpila sentong nung aden.
Yashi Union Defence Minister, Manohar Parrikar-i, tang tashi nung ex servicemen lakh kati OROP tajangzük mangur, ajisüaka taruba ita ana tsüngda iba atema inyaktsü, ta nangzükogo.
OROP scheme atema takhangba agüja Mongolbarnü taoba mapang Rajputana Rifles subedar arishi küm 70 tain, Grewal-i miim chia asü.