NDTV nokdangba ajanga ‘Emergency’ bilemteter: Editors Guild

New Delhi, November 04 (Agencies): November 9, 2016 nü NDTV nokdangtsü atema sorkari telemtetba agiba aija Editors Guild of India-i sangdong ka ajanga, sorkari iba mera agiba ajanga ‘emergency’ mapang bilemteter, ta ashi.
“Anogo ka piyong iba channel nokdangtsü atema telemtetba agibaji odiodia media temeten anema inyakba lir aser sorkari inyakba mapa ajanga Emergency mapang bilemeter,” ta shia Editors Guild-i, iba tetuyubaji tangsa agientsüla, ta takhangba agütsü.
Ministry of Information & Broadcasting inter-ministerial committee kati, iba channel-i kiralongrartemi Pathankot amakba osang prokdang ‘tongtibang osang’ kar jungkai adoktsü ta aija anogo ka atema NDTV India nokdangtsü telemtetba agi.
NDTV India channel-i Pathankot airbase nung raraba osettem rizünga aliba osang yimjak nung metetdaktsü. Iba osangji kiralongrartemi lazük ka asübo, asen linük security nung timtem ajuruba dang masü saka civilian aser defence sepaitema aika lendong tulu ajurula, ta sorkari aitsür.
Ajisüaka NDTV-i parnok indang website nung sangdong ka ajanga, sorkari parnok indang Hindi channel kija anema inyaker, channel aser osangkaket ajak nung kasa osang proka liasü saka NDTV India kija dang tenüng ateter, ta ashi.
Editors Guild sangdong ajangasa, sorkari iba ama tetuyuba ya tang mezüng agütsür, aser iba ya media temeten alema inyakba lir, ta ashi.
Parnokisa, “Osang prokba dak sentakba nung tim masüba lira okadak ken o akatsü atema senso aser state naprongla nem legal teyari balala agüja lir,” ta metetdaktsü.