Delhi ya gas chamber ka mesüka kümogo: Kejriwal

New Delhi, November 05 (Agencies): Mokozü aser mepetzüsü meyoktepba agi akümba ‘smog’ ajanga Delhi yimti ya “gas chamber” ka mesüka kümdaktsüogo, talisa iba ya kidanger Punjab aser Haryana na farm nung mi ajanga lir, ta tanü Delhi Chief Minister, Arvind Kejriwal-i ashi.
Pai ashiba agi, gari senzüba ozüng odd-even mapatong ajanga smog ajema makümtsü, kechiyong mezüng bushisüngdangba ajanga Punjab aser Haryana na nungi mokozü ajanga iba tensa tamajungba kümdaktsür ta bushitetogo.
Osangbenertem senden ka nung Kejriwal-i, “Mopung menenba kanga tali küma Delhi moaputem gas takdang ka mesüka kümogo. Mezüng bushisüngdangba ajanga Haryana aser Punjab na nung aliba alutem indang jana jenti arongba ajanga lir ama bushitetogo,” ta metetdaktsü.
Kejriwal-isa, aluyimertemi akhidang nungi benshiba yimyatem toktsütsüsa parnok nem tanga lenmang sayutsüla mesüra teyari agütsütsüla, ta ashi.
Pai ashiba agi, Delhi sorkarbo tasa kar dang lir, anungji Centre-ia teka amouka inyaktsü nüngdak.
“Centre-i item states nungi chief minister tem den senden mena lenmang ka bushitsüla. Alu nung jana ton million 16 nungi 20 tashi arongba osang lir,” ta pai ashi.
“Diwali mapang fireworks ajanga mopung menenba tera tali kümdaktsü. Ajisüaka Delhi telung nung tanga nungbo temelenshi balaka maliasü. Anungji Smog ya talisa alu nung janatem rongdokba ajanga lir,” ta paisa ashi.
“Ni semdangba mapang Punjab aser Haryana nung mokozü jenti nguogo. Onoki Centre teyari nüngdaker. Delhi nung mopung menenba kuli bushitsü atema taruba hopta ka ana tsüngda agency ka hire asütsü. Centre-i tiyongtsü aita inyaktsü nüngdak,” ta paisa ashi.