NDTV nokdangba atema Cong, JD(U)-i Centre sorkar aitsür

New Delhi/Lucknow, November 05 (Agencies): Narendra Modi’er sorkari anogo ka atema NDTV India news channel nokdangtsü lemtetba aija tanü Congress Party aser JD(U)-i, ibaji tim masü aser tenokdangbaji tangsa agientsüla, ta shiogo.
Osangbenertem den jembidamg JD(U) lenir, K.C. Tyagi-i, iba tenokdangbaji tim masü anungji tangsa agientsüla, ta ashi.
“Sorkari inyakba ya ajanga ni Emergency anogotem bilemteter,” ta shia pai, tang nungibo osang channels aser osangkakettem nung koba osangsa adoktsüar sorkari lemtettsü asü? ta asüngdang.
Ano külen sorkar aija Congress-ia, “Iba ya India media ajak atema osang ka lir, parnoki ashiba inyaktsüla mesüra anentsüla,” ta ashi.
Osangbenertem senden nung Congress lenir aser taoba mapang Information & Broadcasting Union Minister, Manish Tewari-i, “Sorkari agiba mera anema media-i kanga kümdanga inyaktsüla,” ta ashi.
Ministry of Information & Broadcasting-i NDTV channel dang November 8 ayaterm (12:00 ako) nungi November 9 ayaterm tashi iba channel mesayatsü tetuyuba agütsüogo.
Ano külen tanü Lucknow nung Rashtriya Janata Dal (RJD) tongti lenir, Lalu Prasad Yadav-i kasa onük nung BJP-i aniba Centre sorkar aija, iba ya democracy anema inyakba lir, aser tang linük nung emergency mesükba tensa ka lir, ta ashi.
Lalu-i, “Tanü nenoki NDTV dak atalokba nguogo, parnoki (sorkari), kiralongrartemi  Pathankot amakba osang nenoki (news channel) sayaogo ta shiogo” ta metetdaktsü.
Samajwadi Party (SP) küm 25 ajungba benjungmong sentong nung jembidang Lalu-i,
“NDTV nokdangbaji democracy anema inyakba lir. Iba linük ya nisung kati tashi amshiba tsütsüleni odar,” ta ashi.
Lalu-isa, Samajwadi Party benjung nung pa adenbaji Uttar Pradesh nungi BJP aridoktsü atema lir, ta ashi.
“Samajwadi Party tashi itshidaktsütsü atema onok (RJD) yagi aru. Onoki Bihar nungi BJP aridokogo. Uttar Pradesh nungia onoki BJP aridoktsü,” ta Lalu-i ashi.
NDTV India news channel-i Pathankot airbase nung raraba osettem rizünga aliba osang sangdongbaji ajanga, linük security kongshiba dang masü saka civilian aser defence sepaitema aika lendong tulu ajurula ta Ministry of Information & Broadcasting committee-i aitsü.
Ajisüaka NDTV-i parnok indang website nung sangdong ka ajanga, parnoki indang Hindi channel kija anema inyaker, ta ashi.